Eyjólfur Ármannsson innviðaráðherra hefur gert breytingar á reglugerð um ökuskírteini sem fela í sér að eldri ökumenn þurfa ekki lengur sjálfkrafa að leggja fram læknisvottorð við endurnýjun ökuskírteina frá 65 ára aldri. Fram kemur í tilkynningu frá yfirvöldum að nýju reglurnar taki mið af samvinnu innviðaráðuneytisins og heilbrigðisráðuneytisins.
Samkvæmt breytingunni verður læknisvottorðs ekki krafist sjálfkrafa fyrr en umsækjandi hefur náð 75 ára aldri. Áður gilti sú regla að einstaklingar þurftu að framvísa slíku vottorði frá 65 ára aldri við endurnýjun ökuréttinda.
Yfirvöld leggja þó áherslu á að aðrar reglur um læknisvottorð haldist óbreyttar. Þannig verður áfram hægt að krefjast læknisvottorðs vegna sjónskerðingar eða annarra heilsufarsvandamála sem geta haft áhrif á hæfni einstaklinga til aksturs.
Í tilkynningunni er einnig bent á að ákveðinn hópur ökumanna hafi aukin ökuréttindi sem fylgdu almennum ökuréttindum samkvæmt eldri reglum. Þeir sem vilja halda þessum réttindum við endurnýjun ökuskírteinis þurfa áfram að skila læknisvottorði.
Þrátt fyrir breytingarnar þurfa umsækjendur sem ekki leggja fram læknisvottorð enn að undirrita heilbrigðisyfirlýsingu þegar sótt er um eða endurnýjað ökuskírteini hjá sýslumanni.
Athugasemdir