Lögreglan á höfuðborgarsvæðinu hafði í mörg horn að líta í nótt og í gærkvöldi og sinnti fjölda verkefna sem tengdust umferðarlagabrotum, ölvun, óspektum og minniháttar slysum víðs vegar um umdæmið.
Í miðborginni barst tilkynning um mann sem var að spreyja á húsvegg en hann var farinn af vettvangi áður en lögregla kom á staðinn. Einnig var tilkynnt um slagsmál milli einstaklinga og ölvuðum aðila vísað úr verslun. Þá var lögreglu tilkynnt um eld í ruslagámi, en búið var að slökkva eldinn áður en viðbragðsaðilar komu á vettvang.
Tveir ökumenn voru stöðvaðir grunaðir um akstur undir áhrifum áfengis. Annar þeirra var sviptur ökuréttindum og fluttur á lögreglustöð, en báðir voru látnir lausir að lokinni blóðsýnatöku. Þá var ökumaður kærður fyrir að aka gegn rauðu ljósi og án ökuréttinda. Annar aðili var einnig kærður fyrir akstur án ökuréttinda og reyndist auk þess hafa fíkniefni í fórum sínum.
Í Hafnarfirði barst tilkynning um hávaða frá sparkvelli við skóla, en enginn var á staðnum þegar lögregla kom. Þar varð einnig umferðarslys þar sem meiðsl reyndust minniháttar.
Í Breiðholti voru tveir ökumenn stöðvaðir fyrir brot í umferðinni. Annar var kærður fyrir akstur án ökuréttinda og einnig var tilkynnt um umferðarslys þar sem meiðsl reyndust lítil. Þá voru þrír ökumenn kærðir fyrir of hraðan akstur, en sá sem hraðast ók mældist á 130 km/klst þar sem leyfður hámarkshraði er 80 km/klst.
Í Grafarvogi var ökumaður stöðvaður án ökuréttinda. Við nánari athugun kom í ljós að hann hafði einnig dvalið of lengi á Schengen-svæðinu og var því fluttur á lögreglustöð vegna frekari rannsóknar. Þá var tilkynnt um umferðaróhapp í hverfinu þar sem bæði meiðsl og eignatjón reyndust minniháttar.
Athugasemdir