Inga Sæland, barna- og menntamálaráðherra og formaður Flokks fólksins, hefur snúið aftur til starfa eftir átján daga veikindaleyfi. Hún greinir frá því í myndskeiði á Facebook að hún hafi verið frá vinnu vegna flensu sem hafi valdið hósta, kvefi og vanlíðan.
Tilkynnt var 29. maí að Inga færi í veikindaleyfi og tók Ragnar Þór Ingólfsson við verkefnum hennar á meðan. Þá var ekki upplýst um eðli veikindanna.
Í myndskeiðinu segir Inga að hún sé nú á leið á ríkisstjórnarfund eftir að hafa náð sér af veikindunum. Hún bendir á að veirur geti lagt alla að velli, þar á meðal kjörna fulltrúa.
Fram undan hjá ráðherranum eru ríkisstjórnarfundur og atkvæðagreiðslur á Alþingi. Hún segist hlakka til að hefja störf að nýju eftir fjarveruna.
Athugasemdir