VestFest, góðgerðargötuhátíð og tónleikar til styrktar Píeta-samtökunum, fara fram við Vesturbæjarlaug í Reykjavík miðvikudaginn 8. júlí frá klukkan 16 til 21. Að baki hátíðinni standa 15 nemendur í 9. bekk Hagaskóla sem hafa skipulagt viðburðinn frá grunni með það að markmiði að safna fé fyrir starfsemi samtakanna.
Samkvæmt tilkynningu frá skipuleggjendum verður dagskráin fjölbreytt og ætluð öllum aldurshópum. Á svæðinu verða veitingasala, fatamarkaður, leikir og lifandi tónlist. Áhersla er lögð á að skapa jákvæðan og vímuefnalausan viðburð fyrir fjölskyldur og gesti.
Kynnir hátíðarinnar verður Bergur Ebbi Benediktsson. Fjöldi þekktra tónlistarmanna og plötusnúða kemur fram, þar á meðal Una Torfa, Moses Hightower, Háski, Gugusar, Hallfríður Helga, Emma Nardini, DJ Egill Spegill, DJ Benni B-Ruff og DJ Laxness.
VestFest er skipulögð af nemendum sem taka þátt í skapandi vinnuhópi Frosta en krakkarnir eru allir úr Hagaskóla. Hafa ungmennin séð um undirbúning viðburðarins frá upphafi og fengið listafólk og aðra þátttakendur til liðs við sig.
Í tilkynningu segir að markmiðið sé að standa fyrir jákvæðum samfélagsviðburði þar sem safnað verði fé til góðs málefnis um leið og gestum verði boðið upp á fjölbreytta afþreyingu.
Athugasemdir