Faðir stefnir barnsmóður sinni

Faðir hefur höfðað mál fyrir Hér­aðs­dómi Reykja­víkur og krefst þess að fá einn fulla for­sjá og lög­heim­ili ungs barns síns en greint er frá þessu í Lög­birt­inga­blað­inu.

Jafn­framt er þess kraf­ist að hér­aðs­dómur ákveði fyr­ir­komu­lag umgengni og með­lags­greiðslur.

Samkvæmt stefnu máls­ins voru for­eldrar barns­ins í skráðri sam­búð þegar barnið fædd­ist hér á landi árið 2021. Sambandi þeirra lauk í júní 2024 en ekki var gengið form­lega frá sam­búð­ar­slit­unum hjá sýslu­manni. Í kjöl­farið flutti móð­irin með barnið til Portú­gals án sam­þykkis hins, að því er fram kemur í stefn­unni. Barnið var síðan sótt til Portú­gals í sept­em­ber sama ár og hefur sam­kvæmt mála­til­bún­að­inum búið á Íslandi síðan.

Stefn­andi heldur því fram að hann hafi frá þeim tíma einn séð um upp­eldi og fram­færslu barns­ins. Þá hafi móð­irin ekki tekið þátt í kostn­aði vegna barns­ins og sam­skipti við það verið mjög tak­mörkuð. Til­raunir til að ganga form­lega frá sam­búð­ar­slitum og öðrum málum fyrir sýslu­manni hafi ekki borið árangur. Sátta­vott­orð hafi verið gefið út í febr­úar síð­ast­liðnum eftir að sættir tók­ust ekki.

Í stefn­unni kemur einnig fram að lög­heim­ili barns­ins hafi í mars síð­ast­liðnum verið fært aft­ur­virkt til Portú­gals frá des­em­ber 2024 án vit­neskju eða sam­þykkis stefn­anda. Sú breyt­ing hafi meðal ann­ars sett leik­skóla­pláss barns­ins í hættu og leitt til veru­legs bak­reikn­ings vegna leik­skóla­gjalda. Þjóðskrá hafi síðar við­ur­kennt mis­tök og leið­rétt skrán­ing­una aft­ur­virkt í júní.

Stefn­andi byggir kröfur sínar á því að núver­andi fyr­ir­komu­lag sé ekki barn­inu fyrir bestu. Barnið hafi búið á Íslandi frá sept­em­ber 2024, gangi þar í leik­skóla og hafi komið sér upp föstum dag­legum venjum og sterku stuðn­ings­neti. Þá sé núver­andi rétt­ar­staða sögð valda vand­kvæðum þegar taka þurfi mik­il­vægar ákvarð­anir um meðal ann­ars heil­brigð­is­þjón­ustu og vel­ferð barns­ins.

Einnig er farið fram á að með­lag verði greitt aft­ur­virkt frá sept­em­ber 2024 og að for­sjá og lög­heim­ili barns­ins verði tíma­bundið hjá stefn­anda á meðan málið er rekið.

Málið verður þing­fest fyrir Hér­aðs­dómi Reykja­víkur í des­em­ber.