Eftir stórfellt utanvegahneyksli fyrr í sumar hafa aðrir franskir ferðamenn fundið aðra leið til að sýna að þeir ætli sér að virða íslenska náttúru. Áletrun aftan á frönskum bíl hefur vakið mikla kátínu á vegum landsins.
„Friendly Frenchies inside – we respect the F-roads better than we speak english“ eða „Vinalegir Frakkar innanborðs – við virðum F-vegi betur en við tölum ensku.“ Þessi orð, skrifuð aftan á bíl franskra ferðamanna sem nú ferðast um Ísland, hitta beint í mark hjá þeim sem þau sjá.
Áletrunin er augljóslega beinskeytt og kaldhæðnislegt svar við stóra hneykslismálinu sem skók landann fyrr í sumar. Þá olli annar hópur franskra ferðamanna á vel búnum Land Rover jeppum gríðarlegri reiði með stórfelldum og endurteknum utanvegaakstri á viðkvæmum svæðum á borð við Emstruleið, nálægt Kötlujökli, Einhyrningi og Hvanngili.
Í því máli keyrðu ferðamennirnir vísvitandi yfir viðkvæman jarðveg til að krækja fram hjá snjósköflum á lokuðum vegum og deildu myndböndum á samfélagsmiðlum. Þeir létu ekki segjast eftir tiltal landvarða og enduðu á að fá hundruð þúsunda króna sektir frá lögreglunni á Suðurlandi, en skemmdirnar munu taka áratugi að gróa.
Frönsku ferðamennirnir sem deila nýju áletruninni hafa greinilega frétt af skemmdarverkum landa sinna. Með því að skrifa þetta á bílinn eru þeir á mjög fyndinn hátt að biðjast afsökunar fyrir hönd þjóðar sinnar, sýna samstöðu með íslenskri náttúruvernd og undirstrika að málfræðikunnátta sé aukaatriði svo lengi sem lögin á hálendinu séu virt.
Athugasemdir