Fjölmiðlafyrirtækið Sýn hefur ákveðið að hætta framleiðslu og útsendingu sjónvarpsfrétta frá og með 1. september 2026. Síðasti sjónvarpsfréttatíminn á SÝN verður sendur út í kvöld og lýkur þar með 40 ára samfelldri sögu sjónvarpsfrétta hjá félaginu, sem hófst með tilkomu Stöðvar 2 árið 1986. Samhliða þessu verður framleiðslu og útsendingu á þættinum Íslandi í dag hætt og munu uppsagnir ganga yfir það starfsfólk sem sinnt hefur sjónvarpsfréttaframleiðslu.
Þetta kemur fram í fréttatilkynningu frá Herdísi Dröfn Fjeldsted, forstjóra Sýnar, sem send var starfsfólki í morgun. Í tilkynningunni segir að störfum hjá fyrirtækinu verði fækkað, einkum meðal þeirra sem koma að fréttaflutningi í sjónvarpi.
Breyttar neysluvenjur og harðnandi samkeppni
Ákvörðun Sýnar er sögð tekin í ljósi mikilla breytinga á íslenskum fjölmiðlamarkaði á undanförnum árum. Fréttaneysla almennings hefur færst í vaxandi mæli frá línulegu sjónvarpi yfir á stafræna miðla, sem hefur veikt tekjugrunn innlendra fjölmiðla. Samkvæmt tölum Hagstofu Íslands rann meira en helmingur (51%) af öllu auglýsingafé á Íslandi til alþjóðlegra tæknirisa á borð við Google og Meta árið 2024.
Þessi þróun hefur gert samkeppni einkarekinna miðla við Ríkisútvarpið á auglýsingamarkaði að enn meiri áskorun. Í tilkynningunni kemur fram að tillögur stjórnvalda til stuðnings einkareknum fjölmiðlum hafi ekki haft nægjanleg áhrif á rekstur sjónvarpsfréttanna til að breyta þessari niðurstöðu.
Horft til framtíðar á Vísi og Bylgjunni
Sýn ætlar að beina kröftum sínum í auknum mæli að stafrænum miðlum og útvarpi þar sem eftirspurnin er mest. Markmiðið er að styrkja fréttaþjónustuna á vefmiðlinum Vísi og útvarpsstöðinni Bylgjunni, og tryggja um leið grundvöll fyrir sjálfbærum rekstri til framtíðar. Vísir er í dag á meðal vinsælustu vefmiðla landsins og um 170 þúsund manns á aldrinum 12 til 80 ára hlusta á útvarpsstöðvar Sýnar í hverri viku.
Í tilkynningunni segir að fréttastofa Sýnar muni áfram sinna fréttaþjónustu af fagmennsku og þróa miðlunina í takt við breyttar venjur landsmanna. Þá færði forstjóri Sýnar því starfsfólki sem verður fyrir áhrifum af breytingunum innilegar þakkir fyrir ómetanlegt og mikilvægt framlag í þágu félagsins í gegnum árin.
Athugasemdir