Mikið líf var á Hlégarðstúni í Mosfellsbæ um síðustu helgi þegar Íslandsmeistaramót í prikhestum fór fram í tengslum við bæjarhátíðina Í túninu heima. Mótið var hluti af dagskrá Kjúllans og var hart barist um Íslandsmeistaratitlana.
Í prikhestakeppninni var keppt bæði í stíl og hraða. Dómarar voru Mosfellingarnir Ragnheiður Ríkharðsdóttir, fyrrverandi bæjarstjóri, Ásgeir Jónsson, formaður Aftureldingar, og Hilmar Gunnarsson bæjarstjóri. Steindi Jr. var kynnir keppninnar og stýrði dagskránni.
Birkir Ólafsson stóð að lokum uppi sem Íslandsmeistari í fullorðinsflokki á prikhestinum Kjarna frá Rauðkollsstöðum.
Birkir hyggst þó ekki láta Íslandsmeistaratitilinn nægja og stefnir á frekari afrek í greininni. Að sögn Birkis er næsta stóra verkefni heimsmeistaramótið í prikhestum, sem fram fer í Frankfurt í Þýskalandi 13. júní á næsta ári. Markmið hans er að feta brautina áfram og stefna á atvinnumennsku.
Björn Einarsson varð í öðru sæti á Geisla frá Hvammi og Jóna Margrét Guðmundsdóttir tryggði sér þriðja sætið á Herkúlesi Antoni frá Hrappstöðum.
Athugasemdir