Farþegi var handtekinn á Tenerife North-flugvellinum á Tenerife í síðustu viku eftir að hafa reynt að greiða fyrir vörur um borð í flugvél með fölsuðum 20 evra seðlum.
Maðurinn, sem er fertugur, var á leið frá Madríd til Tenerife þegar áhöfn flugvélarinnar varð tortryggin vegna seðla sem hann framvísaði við kaup um borð. Lögreglunni var gert viðvart og biðu lögreglumenn eftir manninum þegar vélin lenti á Tenerife.
Eftir að aðrir farþegar höfðu yfirgefið vélina höfðu lögreglumenn afskipti af manninum. Við leit í eigum hans fundust nokkrir 20 evra seðlar sem grunur lék á að væru falsaðir.
Að sögn lögregluyfirvalda skorti seðlana ýmis auðkennis- og öryggisatriði sem finna má á ófölsuðum evruseðlum. Þá voru nokkrir þeirra með sama raðnúmer, sem jók enn frekar grunsemdir lögreglu. Frekari rannsókn staðfesti að um falsaða seðla væri að ræða og var maðurinn handtekinn vegna gruns um peningafölsun.
Málið tók síðan aðra stefnu þegar lögregla skoðaði skilríki mannsins. Grunur vaknaði um að persónuskilríki frá heimalandi hans kynnu einnig að vera fölsuð en ekki hefur gefið upp hvers lenskur maðurinn er.
Skjölin hafa verið send sérfræðingum til rannsóknar. Reynist þau fölsuð gæti maðurinn einnig átt yfir höfði sér ákæru vegna fölsunar opinberra skjala.
Athugasemdir