Karlmaður hefur verið sakfelldur í Héraðsdómi Reykjavíkur fyrir brot gegn valdstjórninni eftir að hafa ráðist á lögreglumann við skyldustörf og síðar slegið hann tvívegis í andlitið á lögreglustöð.
Maðurinn játaði brot sín skýlaust fyrir dómi.
Samkvæmt ákæru átti atvikið sér stað að morgni sunnudags á bifreiðastæði við samkomuhús. Þar sparkaði maðurinn tvívegis í innanvert vinstra læri lögreglumanns sem var við skyldustörf.
Maðurinn var í kjölfarið fluttur í fangaklefa á lögreglustöðinni við Vínlandsleið í Reykjavík. Þar hélt árásin áfram en samkvæmt ákæru sló hann sama lögreglumann tvívegis með krepptum hnefa í andlitið og var maðurinn var ákærður fyrir brot gegn valdstjórninni.
Við ákvörðun refsingar var meðal annars litið til ungs aldurs mannsins. Hann hafði þó áður gengist undir lögreglustjórasáttir vegna umferðarlagabrots og vopnalagabrots. Einnig kom fram að maðurinn hefði átt við andlega erfiðleika að stríða og unnið að því að bæta líf sitt.
Dómurinn ákvað að fresta ákvörðun um refsingu skilorðsbundið í þrjú ár. Ákvörðunin fellur niður að þeim tíma liðnum gerist maðurinn ekki sekur um nýtt brot á skilorðstímanum.
Honum var jafnframt gert að greiða 353.400 krónur í málsvarnarþóknun og 55.130 krónur í annan sakarkostnað.
Athugasemdir