Auður Thoroddsen hefur verið dæmd í fjögurra mánaða skilorðsbundið fangelsi fyrir fjárdrátt í tengslum við leigu á fasteignum á Tenerife á Spáni. Héraðsdómur Reykjaness kvað upp dóminn 24. september.
Auður var sakfelld fyrir að hafa dregið sér samtals rúmlega 3,3 milljónir króna sem henni höfðu verið greiddar vegna fyrirhugaðrar leigu á húsnæði á Tenerife. Brotin voru framin á árunum 2018 og 2019.
Annar ákæruliðurinn laut að viðskiptum Auðar við Kjöl, stéttarfélag starfsmanna í almannaþjónustu. Félagið hafði samið við hana um leigu á fasteign á Tenerife fyrir félagsmenn sumarið 2019. Kjölur greiddi henni samtals 22.500 evrur vegna leigunnar og þjónustu tengdrar henni.
Samkvæmt niðurstöðu dómsins greiddi Auður aðeins 5.000 evrur af þeirri fjárhæð til húseigandans. Rannsókn lögreglu leiddi í ljós að hluti fjármunanna fór þess í stað í persónuleg útgjöld hennar.
Þegar félagsmenn Kjalar komu til Tenerife var húsnæðið ekki til reiðu og þurfti félagið að útvega þeim aðra gistingu.
Hinn ákæruliðurinn varðaði konu sem greiddi Auði samtals 930 þúsund krónur árið 2018 vegna leigu á húsi á Tenerife sumarið eftir. Konan fékk hvorki húsið afhent né greiðsluna endurgreidda.
Auður neitaði sök og hélt því fram að hún hefði greitt húseigendum, meðal annars með reiðufé. Dómurinn taldi hins vegar að framburður hennar hefði verið ekki í samræmi við gögn málsins. Hún hefði heldur ekki lagt fram gögn sem staðfestu meintar greiðslur og var hún því dæmd sek.
Við ákvörðun refsingar var meðal annars horft til þess að um alvarlegt trúnaðarbrot hefði verið að ræða. Á móti var tekið tillit til þess hversu langt var liðið frá brotunum og þess óhæfilega dráttar sem varð á rannsókn og meðferð málsins hjá lögreglu og ákæruvaldi.
Auður var dæmd í fjögurra mánaða fangelsi en fullnustu refsingarinnar frestað skilorðsbundið í tvö ár.
Þá var henni gert að greiða Kili 3.092.845 krónur auk vaxta og dráttarvaxta, auk 500 þúsund króna í málskostnað.
Auði var jafnframt gert að greiða rúmar 2,29 milljónir króna í málsvarnarlaun verjanda síns.
Athugasemdir