Kærasti Gypsy Rose Blanchard, Ken Urker, lést í gær, 1. október, 34 ára að aldri. Þetta staðfesti lögreglan í Lafourche-sýslu við bandaríska fréttamiðilinn E! News. Blanchard er þekkt úr raunveruleikaþáttunum Life After Lock Up.
„Okkur barst tilkynning um málið klukkan 18.15 að staðartíma og viðbragðsaðilar voru sendir á vettvang,“ sagði talsmaður lögreglunnar við E! News. „Þegar við komum á staðinn var hann látinn. Rannsókn á andlátinu stendur enn yfir.“
Dánarorsök Urkers hefur ekki verið gefin upp.
Blanchard, 35 ára, og Urker áttu saman 21 mánaðar gamla dóttur, Aurora Raina Urker. Þau kynntust fyrst þegar Blanchard sat í fangelsi fyrir aðild sína að morðinu á móður sinni, Clauddine „Dee Dee“ Blanchard, árið 2015.
Blanchard játaði að hafa gerst sek um manndráp af annarri gráðu eftir að hafa lagt á ráðin með þáverandi kærasta sínum, Nicholas Godejohn, um að myrða móður sína. Hún hafði mátt þola ofbeldi og verið látin gangast undir falskar læknismeðferðir í æsku.
„Urker skrifaði mér stuðningsbréf eftir að hafa horft á heimildarmynd HBO, Mommy Dead and Dearest, árið 2017,“ sagði Blanchard í viðtali við E! News árið 2019. „Ég svaraði honum og fljótlega fórum við að skrifast á í hverri viku. Við urðum fljótt góðir vinir.“
Þau eyddu löngum stundum í símanum á þessum tíma. „Ég talaði við hann eins og ég hefði þekkt hann alla ævi og honum leið eins með mig,“ sagði hún.
Þau trúlofuðu sig meðan Blanchard sat í fangelsi en slitu sambandinu árið 2019 til að einbeita sér að „persónulegum þroska“.
„Við vorum einu sinni svo náin að mér fannst hann vera sálufélagi minn,“ sagði hún við E! News.
Blanchard giftist síðar Ryan Anderson, sérkennslukennara frá Louisiana, eftir að þau kynntust með bréfaskiptum árið 2020.
„Okkur hefur tekist að byggja upp tilfinningaleg tengsl þannig að eftir aðeins tvær sekúndur í síma veit hann hvernig mér líður,“ sagði hún við People. „Hann spyr mig: ‚Er allt í lagi með þig? Viltu tala um það?‘ Ég er þakklát fyrir að eiga mann sem er nógu opinn með eigin tilfinningar til þess að ég geti leyft mínum tilfinningum að flæða.“
Blanchard giftist Anderson árið 2022 meðan hún sat enn í fangelsi.
Blanchard, sem leikkonan Joey King lék í hinni rómuðu smáþáttaröð The Act, var látin laus úr fangelsi í desember 2023 eftir að hafa afplánað sjö ára dóm. Í mars 2024 höfðu hún og Anderson hins vegar slitið samvistum.
„Því miður erum við hjónin að ganga í gegnum skilnað og ég er flutt aftur heim til foreldra minna niðri í Bayou-héraðinu. Ég hef stuðning fjölskyldu minnar og vina sem hjálpa mér að komast í gegnum þetta,“ skrifaði hún á Facebook á sínum tíma. „Ég er að læra að hlusta á hjartað í mér.“
Anderson kenndi „utanaðkomandi áhrifum“ um skilnaðinn.
„Ég er enn að reyna að átta mig á því hvernig þetta gat gerst svona hratt,“ sagði hann við E! News. „Ég er gjörsamlega sleginn yfir því hversu hratt hlutirnir gerast. Þetta er eins og snjóbolti sem ég hef ekki getað stöðvað. Þetta er eitt af þessum málum þar sem allt heldur áfram að rúlla.“
Innan við viku eftir að Blanchard greindi frá sambandsslitunum tók hún aftur upp sambandið við Urker í Louisiana. Það var eins og enginn tími hefði liðið frá því þau voru síðast saman.
„Hvenær vissi ég að hann væri sá rétti? Líklega daginn sem ég hitti hann árið 2017,“ sagði hún við E! News í maí 2024.
Blanchard sagði að þau hefðu „haldið vináttunni allan þennan tíma“ og útskýrði:
„Það var ekki fyrr en ég sótti um skilnað að ég áttaði mig í raun á því að neistinn og tengslin sem ég hafði við Urker voru jafnvel sterkari en ég hafði búist við. Við höfum bæði þroskast mikið. Ég hef þroskast og hann hefur líka vaxið sem einstaklingur. Ég held því að nú sé rétti tíminn í lífi okkar, á réttum stað, og að allt sé eins og það á að vera.“
Tveimur mánuðum síðar tilkynntu þau að Blanchard ætti von á barni.
„Við erum bæði mjög spennt. Þetta var alls ekki planað og kom okkur algjörlega í opna skjöldu,“ sagði hún í myndbandi á YouTube. „Við erum bæði mjög spennt fyrir þessu nýja ferðalagi sem foreldrar.“
Í desember 2024 tilkynnti Urker að dóttir þeirra, Aurora, væri komin í heiminn og kallaði hana „stærstu gjöf allra“.
Athugasemdir