Ástralska skákkonan Hannah Sayce hefur undanfarin ár þurft að glíma við alvarlega áreitni af hálfu manns sem sakaður er um að hafa ofsótt hana og komið því til leiðar að hún væri handtekin bæði á Íslandi og í Katar en ChessBasegreinir frá þessu.
Sayce, sem er frá Melbourne, byrjaði að tefla í heimsfaraldrinum þegar hún var 19 ára. Hún náði fljótt miklum framförum og komst meðal annars í 2300 stig í hraðskák á Chess.com. Síðar hóf hún þátttöku í hefðbundnum skákmótum og ferðaðist víða um Evrópu og Asíu. Samhliða því byggði hún upp stóran fylgjendahóp á Twitch.
Árið 2024 hóf Shumsheer Singh Ghumman, 47 ára kaffihúsaeigandi, að áreita Sayce. Samkvæmt gögnum málsins aflaði hann upplýsinga um hana, fjölskyldu hennar og vini auk þess að fylgjast með ferðaáætlunum hennar. Sayce fékk nálgunarbann gegn honum í mars 2025 en áreitnin hélt áfram.
Þegar Ghumman komst að því að Sayce hygðist ferðast til Katar tilkynnti hann yfirvöldum þar að hún hygðist smygla fíkniefnum í skákmunum sínum. Sayce var handtekin við komuna til landsins og sett í gæsluvarðhald áður en málið var upplýst.
Sambærilegt atvik átti sér stað þegar Sayce kom til Íslands til þátttöku á Reykjavíkurskákmótinu. Ghumman hafði þá einnig sent íslenskum yfirvöldum rangar upplýsingar um meint fíkniefnasmygl og var Sayce handtekin.
Ghumman var handtekinn í Melbourne 1. maí 2026 og stendur nú frammi fyrir 35 ákæruliðum. Dómari hafnaði beiðni hans um lausn gegn tryggingu vegna meintrar hættu sem hann gæti skapað Sayce. Málið verður tekið fyrir að nýju í október og verður Ghumman áfram í haldi þangað til.
Athugasemdir