Þjófar stálu sjaldgæfum safnspilum að verðmæti tæplega einnar milljónar Bandaríkjadala úr FedEx flutningabíl í Kaliforníu fyrr í þessum mánuði. Meðal þýfisins voru verðmæt Pokémon spil.
Þjófnaðurinn átti sér stað 13. október fyrir utan starfsstöð Professional Sports Authenticator, PSA, í Santa Ana í Orange sýslu. Fyrirtækið sérhæfir sig í að staðfesta uppruna safngripa og gefa safnspilum einkunn eftir ástandi þeirra.
Samkvæmt lögreglunni í Santa Ana var hundruðum safnspila stolið og er áætlað verðmæti þeirra um 963 þúsund Bandaríkjadalir, eða rúmlega 110 milljónir íslenskra króna. Lögregla tekur þó fram að endanlegt verðmæti þýfisins hafi ekki verið staðfest.
Spilin voru í eigu safnara víðs vegar um Bandaríkin sem höfðu sent þau til PSA til staðfestingar og mats. Tveimur heilum vörubrettum með safnspilum var stolið auk hluta spilanna á þriðja brettinu. Þar á meðal voru bæði íþróttaspil og Pokémon spil.
Samkvæmt bandaríska íþróttamiðlinum The Athletic var brotist inn í FedEx bílinn á meðan ökumaður hans var fjarverandi í um 60 til 90 mínútur.
Collectors, móðurfélag PSA, hefur greint frá því að skráningarskírteini stolnu spilanna hafi verið gerð óvirk. Jafnframt hafi samstarfsaðilar á markaði verið látnir vita svo hægt verði að bera kennsl á sjaldgæf og númeruð spil ef reynt verður að selja þau.
Fyrirtækið hefur einnig haft samband við þá safnara sem urðu fyrir tjóni og hyggst greiða þeim bætur miðað við sanngjarnt markaðsverð.
Enginn hafði verið handtekinn vegna málsins þegar síðast fréttist og rannsókn lögreglu stendur enn yfir.
Þjófnaðurinn bætist í röð sambærilegra mála í Bandaríkjunum þar sem verðmæt Pokémon spil hafa verið skotmark þjófa. Verð á sjaldgæfum eintökum hefur hækkað verulega undanfarin ár og geta eftirsóttustu spilin verið metin á háar fjárhæðir.
Athugasemdir