Breski Formúlu 1-kappakstursmaðurinn Sir Lewis Hamilton skorar á Ísraelsstjórn að hleypa hjálpargögnum inn á Gaza-svæðið og segir engar afsakanir réttlæta að hindra neyðaraðstoð til almennra borgara. Þetta kemur fram í færslu hans á Instagram eftir heimsókn að landamærastöðinni við Rafah í Egyptalandi.
Hamilton, sem hefur sjö sinnum orðið heimsmeistari í Formúlu 1, heimsótti landamærastöðina á þriðjudag. Þar kynnti hann sér hvernig mannúðaraðstoð er undirbúin og henni komið áleiðis til Gaza. Hann heimsótti einnig birgðageymslur egypska Rauða hálfmánans.
Í færslu sinni í gær gagnrýndi hann harðlega framgöngu Ísraels á Gaza-svæðinu.
„Síðustu þrjú ár af þjóðarmorði Ísraels á Gaza eru skelfileg. Það er óréttlæti að fólk sé svipt frelsi sínu, öryggi og mannlegri reisn. Enga manneskju ætti að meðhöndla eins og líf hennar skipti minna máli,“ skrifaði Hamilton.
Hamilton lýsti því sem hann sá við landamærastöðina. Þar hefðu vörubílar fullir af matvælum staðið tilbúnir til að fara inn á Gaza en reglulega verið stöðvaðir eða tafðir um langan tíma.
Í vöruflutningamiðstöð í nágrenninu hefði hann einnig séð að ýmsum hjálpargögnum var hafnað af því sem hann kallaði „fáránlegum ástæðum“. Þar á meðal voru svefnpokar, sjúkrakassar, lækningabúnaður, hjólastólar og jafnvel fótboltar ætlaðir börnum.
„Ísrael verður að standa við skuldbindingar sínar samkvæmt vopnahléinu og hleypa hjálpargögnunum inn. Engar afsakanir,“ skrifaði hann.
Hann bætti við að hann vildi ekki að fólk venjist þjáningum íbúa Gasa eða líti undan.
Hamilton er 41 árs og hefur látið mannúðarmál til sín taka um árabil. Árið 2021 stofnaði hann góðgerðarsamtökin Mission 44, sem styðja ungt fólk og vinna að auknum tækifærum þess til menntunar og atvinnu.
Hamilton keppir nú fyrir Ferrari í Formúlu 1. Hann er í fjórða sæti í stigakeppni ökumanna, einu stigi á eftir George Russell í þriðja sæti.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir