Réttarhöld hafin vegna banvænnar hnífaárásar á sextán ára stúlku

Hin sextán ára Chloe Watson Drans­fi­eld var stungin fimm sinnum til bana í fyr­ir­fram ákveðnum slags­málum í Leeds á Englandi. Átökin áttu sér stað vegna drengs sem hafði verið í sam­bandi við bæði hana og árás­ar­kon­una.

Rétt­ar­höld yfir Kaylu Smith, átján ára, og tveimur öðrum ung­mennum eru hafin í Leeds Crown Court. Smith hefur játað mann­dráp af gáleysi en neitar morði. Blake Dowling, átján ára, og Archie Rycroft, tví­tugur, neita sök um bæði morð og mann­dráp af gáleysi.

Chloe lést af stungusárum á hálsi og baki eftir árás­ina snemma morg­uns 28. mars.

Fyrir dómi kom fram að Smith hefði hótað Chloe ítrekað í síma eftir að hún komst að því að hún væri með Dowling. Hún hefði meðal ann­ars öskrað: „Ég ætla að stinga þig í háls­inn.“

Stúlk­urnar sömdu um að hitt­ast og berj­ast. Dowling bók­aði leigu­bíl og fór með Chloe heim til Smith um nótt­ina.

Smith kom út úr sum­ar­húsi í garði afa síns vopnuð hnífi og stakk Chloe fimm sinnum. Rycroft fylgdi henni og er sak­aður um að hafa tekið árás­ina upp á síma. Mynd­band­inu var síðar eytt og hefur ekki fund­ist.

Á upp­töku úr dyra­bjöllu­mynda­vél heyr­ist Smith hrópa til Chloe: „Komdu þá, ég ætla að stinga þig.“

Um mín­útu eftir árás­ina heyrð­ist afi Smith segja að hann ætl­aði að hringja í lög­regl­una. Smith svar­aði: „Þú mátt ekki hringja í lög­regl­una, hún er dáin.“

Afi hennar kall­aði ekki eftir sjúkra­bíl fyrr en 37 mín­útum eftir árás­ina en nágranni hans sá hann reyna að end­ur­lífga Chloe á gang­stétt­inni. Chloe var að lokum flutt á sjúkra­hús en úrskurðuð látin klukkan 6.40.

Þegar lög­regla hand­tók Smith og Rycroft voru þau að sögn sak­sókn­ara að hlæja og gant­ast með vinum sínum og nota hlát­ur­gas í við­ur­vist lög­reglu­mann­anna.

Að sögn sak­sókn­ara skipu­lagði Dowling átökin með því að fara með Chloe á vett­vang svo hún gæti barist við Smith. Rycroft er sak­aður um að hafa ýtt undir ofbeldið með því að fylgja Smith og reyna að taka árás­ina upp. Dowling sagð­ist ekki hafa vitað að Chloe yrði fyrir alvar­legu lík­ams­tjóni. Rycroft sagð­ist hafa fylgt Smith af for­vitni og ekki séð að hún væri með hníf.

Smith við­ur­kennir að hafa veitt Chloe ban­væna sárið en seg­ist hvorki hafa ætlað að drepa hana né valda henni mjög alvar­legum áverkum.