Lögreglan í London hefur ákært 13 ára dreng fyrir tvær tilraunir til manndráps eftir hnífaárás í Kingsbury-skólanum í norðvesturhluta borgarinnar. Atvikið átti sér stað í hádeginu á þriðjudag.

Samkvæmt tilkynningu frá lögreglunni er drengurinn einnig ákærður fyrir að hafa haft hníf í fórum sínum á skólalóð og fyrir að hafa úðað skordýraeitri í andlit þriðja fórnarlambs. Vegna aldurs síns má ekki birta nafn hans.

Tveir piltar, 12 og 13 ára, sem særðust í árásinni, eru enn á sjúkrahúsi en eru sagðir í stöðugu ástandi.

Helen Flanagan, yfirmaður hjá hryðjuverkadeild lögreglunnar í London, sagði í yfirlýsingu að um afar alvarlegar ákærur væri að ræða gegn svo ungum einstaklingi. Hún bætti við að lögregla héldi áfram að styðja við fórnarlömbin, fjölskyldur þeirra og skólasamfélagið allt í kjölfar þessa áfalls.

Ofbeldi meðal ungmenna og notkun hnífa hefur lengi verið vandamál í Bretlandi, sérstaklega í London. Samkvæmt samtökum kennara hefur ofbeldi innan skóla farið vaxandi á landsvísu undanfarin ár.

Hinn grunaði var handtekinn á svæðinu nokkrum klukkustundum eftir árásina og mun hann mæta fyrir dóm í miðborg London síðar í dag. Rannsókn málsins stendur enn yfir.