Rúmlega þrítugur palestínskur maður hefur verið ákærður fyrir tilraun til manndráps og sérstaklega hættulega líkamsárás vegna atvika í úrræði fyrir hælisleitendur á Valhallarbraut í Reykjanesbæ aðfaranótt 15. júní.

DV greindi frá málinu.

Samkvæmt ákæru réðst maðurinn á tvo menn, annan frá Palestínu og hinn frá Jórdaníu.

Manninum er annars vegar gefið að sök að hafa stungið annan brotaþolann í bakið með egghvössu áhaldi. Stungan gekk inn í brjósthol og olli meðal annars lífshættulegu loftbrjósti og blóðbrjósti. Brotaþolinn þurfti meðferð með brjóstholskera.

Hins vegar er ákærði sagður hafa skorið hinn manninn í vinstri upphandlegg. Sá hlaut um 20 sentímetra langan skurð sem loka þurfti með 15 sporum.

Brotaþolarnir krefjast samtals 6,5 milljóna króna í miskabætur, annars vegar fjögurra milljóna og hins vegar 2,5 milljóna króna.

Málið var þingfest í Héraðsdómi Reykjaness 15. september síðastliðinn.