Anna María Sverrisdóttir, fyrrverandi kennari, segist hafa orðið fyrir óvæntum og harkalegum viðbrögðum þegar hún gekk í hús í Reykjavík í vikunni og dreifði kynningarefni fyrir Já-hreyfinguna vegna komandi þjóðaratkvæðagreiðslu.
Baráttan milli fylkinga Já og Nei hefur færst í aukana eftir því sem nær dregur kosningum og hefur hún á köflum orðið óvægin og jafnvel ljót að mati sumra. Frásögn Önnu Maríu má líta á sem eina birtingarmynd þeirrar hörku sem hefur einkennt lokasprett kosningabaráttunnar.
Anna María greinir frá reynslu sinni í færslu á Facebook undir yfirskriftinni „Hvað kom eiginlega fyrir þetta samfélag?“
Hún segist hafa ákveðið að fara í göngutúr og dreifa einblöðungi með áletruninni „Já til að sjá“. Hún hafi gengið um fjórar götur í hverfi í borginni og sett bæklinginn í bréfalúgur.
Að sögn Önnu Maríu brugðust sumir íbúar illa við. Í tveimur tilvikum hafi húseigendur komið út og kallað á eftir henni að hún mætti hirða bæklinginn aftur. Í einu tilviki hafi verið hrópað að henni að hún væri „landráðamaður“ auk annarra ókvæðisorða.
Viðbrögðin voru þó ekki öll neikvæð. Anna María segir að aðrir hafi þakkað henni fyrir eða brosað til hennar.
„Aldrei hefði ég trúað svona framkomu af hálfu almennings á Íslandi,“ skrifar hún.
Þjóðaratkvæðagreiðslan fer fram næstkomandi laugardag. Mjótt hefur verið á munum milli fylkinganna í skoðanakönnunum. Já-hliðin hafði lengst af mælst rétt yfir Nei-hliðinni í könnunum, en í nýjustu könnuninni í gær snerist staðan við og Nei mældist örlítið stærra en Já.
Því stefnir í afar tvísýna kosningu og ljóst að lokaspretturinn verður mikilvægur fyrir báðar fylkingar.
