Landskjörstjórn hefur gefið út heimildir til kosningaeftirlits við þjóðaratkvæðagreiðsluna á grundvelli 138. gr. kosningalaga.
Helstu markmið og tilgangur kosningaeftirlits eru m.a. að auka gagnsæi við framkvæmd kosninga og efla traust kjósenda, framboða og almennings á niðurstöðum kosninga. Kosningaeftirlit getur því styrkt faglega framkvæmd og leitt til umbóta á málefnasviðinu.
Eftirtalin samtök og stofnanir hafa fengið heimild landskjörstjórnar til kosningaeftirlits við þjóðaratkvæðagreiðsluna 29. ágúst:
- Sendinefnd bresku samtakanna Democracy Volunteers,
- Sérfræðingateymi Mannréttinda- og lýðræðisstofnunar ÖSE (Office for Democratic Institutions and Human Rights, ODIHR)
- Heimssýn, samtök sjálfstæðissinna í Evrópumálum.
Gert er ráð fyrir að niðurstöður kosningaeftirlits séu opinberar og að eftirlitið fari fram í samræmi við alþjóðlega staðla á þessu sviði.
Auk þess er hér á landi stödd sendinefnd frá eistneska þinginu (Riigikogu) í því skyni að kynna sér framkvæmd þjóðaratkvæðagreiðslunnar.
Þá er nokkur fjöldi erlendra blaðamanna á landinu til að fylgjast með þjóðaratkvæðagreiðslunni.
