Héraðsdómur Reykjavíkur hefur dæmt Arnar Má Pétursson í 30 daga skilorðsbundið fangelsi fyrir brot gegn valdstjórninni eftir að hafa hrækt á lögreglumann við skyldustörf á lögreglustöðinni við Hverfisgötu í Reykjavík aðfaranótt 22. febrúar 2025.
Samkvæmt dómi var Arnar ákærður fyrir að hafa hrækt á lögreglumann með þeim afleiðingum að munnvatn hans lenti á fatnaði lögreglumannsins.
Málið var tekið til dóms án frekari sönnunarfærslu þar sem Arnar játaði sök skýlaust. Héraðsdómur taldi brotið sannað með játningu hans og öðrum gögnum málsins.
Við ákvörðun refsingar leit dómurinn meðal annars til þess að Arnar hafði ekki áður gerst sekur um refsiverða háttsemi og að hann játaði brotið skýlaust, sem var metið honum til málsbóta samkvæmt almennum hegningarlögum.
Refsing hans var ákveðin 30 daga fangelsi en fullnustu hennar frestað. Fellur refsingin niður að tveimur árum liðnum frá birtingu dómsins, að því gefnu að hann haldi almennt skilorð á því tímabili.
Jafnframt var Arnar dæmdur til að greiða málsvarnarþóknun skipaðs verjanda síns, Björgvins Jónssonar lögmanns, að fjárhæð 247.380 krónur með virðisaukaskatti. Enginn annar sakarkostnaður féll til í málinu.
