Hópur tengdur MAGA-hreyfingunni greiddi fyrir Norðurlandaferð hóps háttsettra Repúblikana sem hittu Sigmund Davíð Gunnlaugsson, formann Miðflokksins og fyrrverandi forsætisráðherra, og aðra áhrifamenn á hægri væng stjórnmálanna á leynifundi en Heimildin greinir frá þessu í nýjasta blaði sínu.
Í fréttinni fer blaðið ítarlega yfir tengsl Sigmundar og annarra Íslendinga við bandarískar hugveitur sem fjármagnaðar eru af bandarískum auðmönnum.
Meðal þeirra sem komu að skipulagningu ferðarinnar voru einstaklingar sem hafa verið grunaðir um að hafa reynt að hafa áhrif á eða stela forsetakosningunum 2020 Donald Trump, forseta Bandaríkjanna, í vil.
Vekur þetta sérstaka athygli í ljósi þess að fáir hafa verið jafn gagnrýnir á áhrif erlendra auðmanna á Íslandi og Sigmundur Davíð.
Heimildin reyndi að fá svör frá fyrrum forsætisráðherranum fyrir fréttina en Sigmundur þorði ekki að svara spurningum miðilsins.
Spurningarnar átta sem Sigmundur þorði ekki að svara
- Geturðu staðfest að þú hafir hitt hóp starfsmanna öldungadeildarþingmanna Repúblikanaflokksins á fundi í Gautaborg í ágúst 2025?
- Hvað var rætt á fundinum?
- Greiddu Nordic Sidebar, New Direction, Turning Point Action eða önnur erlend samtök ferðakostnað þinn og/eða uppihald að einhverju eða öllu leyti?
- Hafa New Direction eða önnur erlend samtök greitt fyrir ferðir þínar á Young Leaders Academy í júní 2023, Nostos ráðstefnurnar 2022 og 2023, Atreju og ARC ráðstefnurnar í fyrra eða einhverjar aðrar ráðstefnur sem þeim tengjast?
- Ef svo er, hyggstu uppfæra hagsmunaskráningu þína á vef Alþingis til að sýna þær gjafir opinberlega?
- Er Miðflokkurinn í aðildarferli hjá ECR flokknum?
- Telurðu Miðflokkinn eiga hugmyndafræðilega samleið með þeim alþjóðlegu flokkum sem eru hluti af ECR, svo sem Svíþjóðardemókrötum, Bræðralagi Ítalíu, Repúblikanaflokknum í Bandaríkjunum og Likud í Ísrael?
- Er einhver fótur fyrir því sem haldið var fram í dálknum Orðið á götunni í DV að forystumenn í Miðflokknum hafi í fyrra ferðast til Bandaríkjanna til að sækja námskeið tengt MAGA-hreyfingunni?
