Valdimar Víðisson hefur tekið við starfi skólastjóra Húsaskóla og segir það mikilvægt að leggja frá upphafi áherslu á gott og opið samstarf milli heimila og skóla. Valdimar er fyrrverandi bæjarstjóri og núverandi bæjarfulltrúi Hafnarfjarðar.

Í færslu á Facebook-síðu Húsaskóla ávarpar Valdimar foreldra nemenda Húsaskóla og segist taka við starfinu fullur tilhlökkunar. Hann hafi þegar fundið fyrir þeim góða anda sem ríki innan skólans.

Valdimar hefur starfað við grunnskóla í rúm 20 ár og segir reynsluna hafa kennt sér hversu mikilvæg góð samskipti séu í skólastarfi.

„Ég legg mikla áherslu á opið og gott samtal og að foreldrar finni að dyr skólans standi þeim ávallt opnar,“ segir Valdimar.

Hann segir gott samstarf heimilis og skóla einn af hornsteinum farsællar skólagöngu. Skólinn og foreldrar séu í sama liði og markmiðið sé að börnunum líði vel, þau finni til öryggis og fái tækifæri til að vaxa og dafna.

Skólaárið í Húsaskóla verður formlega sett á mánudag en skólasetningin verður með breyttu sniði. Árgangar mæta á mismunandi tímum í stað þess að allir nemendur komi saman í einu.

Segir Valdimar vonir standa til þess að fyrirkomulagið skapi notalegri og persónulegri stund fyrir nemendur og foreldra við upphaf skólaársins.

„Ég hlakka til að sjá ykkur á mánudaginn, hitta ykkur og börnin ykkar og hefja nýtt og spennandi skólaár í Húsaskóla,“ segir Valdimar.