Mannréttindastjóri Sameinuðu þjóðanna og forseti leiðtogaráðs Evrópusambandsins krefjast þess að bandarísk stjórnvöld afnemi refsiaðgerðir gegn fjórum dómurum Alþjóðlega sakamáladómstólsins, ICC.

Mannréttindastjóri Sameinuðu þjóðanna, Volker Turk, krefst þess af stjórnvöldum í Bandaríkjunum að þau aflétti refsiaðgerðum gegn fjórum dómurum Alþjóðlega sakamáladómstólsins.

Dómararnir fjórir höfðu átt þátt í að skipa rannsóknir á hátterni bandarískra hermanna í Afganistan, og gefa út handtökuskipun gegn ísraelskum ráðamönnum, þar á meðal Benjamin Netanyahu forsætisráðherra Ísraels.

Vegna þessara refsiaðgerða verða eignir dómaranna fjögurra í Bandaríkjunum frystar. Einng verður fyrirtækjum í Bandaríkjunum bannað að stunda nokkur viðskipti við fjórmenningana.

Segir Turk að viðbrögðin gegn dómurunum fyrir að sinna skyldum sínum við dóminn gangi klárlega gegn alþjóðalögum, og Antonio Costa, forseti leiðtogaráðs Evrópusambandsins, segir að Evrópusambandið styðji Alþjóðlega sakamáladómstólinn algjörlega.

Costa leggur áherslu á að Alþjóðlegi sakamáladómstóllinn sé alls ekki andstæðingur þjóða heldur beiti dómstóllinn sér gegn refsileysi. Hann telur þörf á að vernda sjálfstæði dómstólsins og heilindi, enda verði lög að ganga framar völdum.