Héraðsdómur Reykjavíkur hefur dæmt Bjart Daly Þórhallsson í tveggja mánaða skilorðsbundið fangelsi fyrir líkamsárás á konu í Kópavogi í júlí 2023. Fullnustu refsingarinnar er frestað í tvö ár haldi hann almennt skilorð.

Bjartur var ákærður fyrir sérstaklega hættulega líkamsárás. Samkvæmt ákæru sló hann konuna í höfuðið með krepptum hnefa þannig að hún féll í götuna og sparkaði síðan í höfuð hennar þar sem hún lá. Konan hlaut meðal annars nefbrot, bólgur og mar í andliti.

Bjartur játaði að hafa slegið konuna en neitaði að hafa sparkað í hana. Fyrir lá myndskeið sem sýndi konuna ráðast á hann og slá hann ítrekað áður en hann svaraði fyrir sig.

Dómurinn taldi ekki hafið yfir skynsamlegan vafa að Bjartur hefði sparkað í andlit konunnar. Hins vegar þótti sannað að hann hefði veitt henni tvö hnefahögg í höfuðið þannig að hún féll aftur fyrir sig á gangstétt eða götu. Einnig var talið sannað að nefbrot konunnar hefði hlotist af höggunum. Var háttsemin því heimfærð undir líkamsárás en ekki sérstaklega hættulega líkamsárás.

Við ákvörðun refsingar var meðal annars litið til þess að konan hafði ráðist á Bjart og slegið hann ítrekað áður en hann sló hana. Þá hafði hann sýnt iðrun og mikla eftirsjá. Á móti kom að árás hans var alvarleg, beindist að höfði konunnar og verulegur stærðar- og aflsmunur var á þeim.

Bjarti var jafnframt gert að greiða konunni 664.907 krónur í skaða- og miskabætur, þar af 600 þúsund krónur í miskabætur.