Frá klukkan 17:00 í gær til 05:00 í nótt, voru 89 mál skráð í kerfi lögreglunnar á höfuðborgarsvæðinu, samkvæmt dagbók hennar. Alls gista nú átta í fangageymslu hennar. Hér má sjá brot af verkefnum lögreglunnar á téðu tímabili.
Sex einstaklingar voru handteknir af lögreglunni sem starfar á Hverfisgötunni, vegna gruns um að aka undir áhrifum ávana- og eða fíkniefna. Voru þeir allir lausir eftir blóðsýnatöku. Tveir til viðbótar voru handteknir grunaðir um ölvunarakstur en var sleppt að lokinni blóðsýnatöku.
Sama lögregla handtók mann grunaðan um innbrot og var hann vistaður í fangaklefa en málið er í rannsókn.
Rétt eins og í gærnótt voru þrír handteknir grunaðir um líkamsárás og var einn þeirra vistaður í fangaklefa vegna málsins.
Lögreglan sem starfar í Kópavogi og í Breiðholtinu handtók þrjá ökumenn, tveir þeirra voru grunaðir um akstur undir áhrifum ávana- og eða fíkniefna og einn þeirra grunaður um ölvunarakstur. Voru þeir allir lausir eftir blóðsýnatöku.
Þá var óskað aðstoðar sömu lögreglu vegna líkamsárásar á ölhúsi en málið er í rannsókn.
Nákvæmlega það sama má segja um lögregluna sem annast útköll í Garðabæ og í Hafnarfirði en tveir ökumenn voru handteknir vegna gruns um akstur undir áhrifum ávana- og eða fíkniefna og sá þriðji var handtekinn vegna gruns um ölvunarakstur. Var þeim öllum sleppt að lokinni blóðsýnatöku.
Sama lögregla var beðin um að aðstoða eftir að bifreið var ekið á hús en ekki urðu slys á fólki.
Lögreglan sem hefur bækistöðvar á Vínlandsleið handtók tvo ökumenn, annan þeirra vegna gruns um akstur undir áhrifum ávana- og eða fíkniefna og hinn vegna gruns um ölvunarakstur. Báðum var sleppt eftir blóðsýnatöku.
Vínlandsleiðarlögreglan fór einnig í útkall vegna líkamsárásar í heimahúsi og er málið í rannsókn.
