Borgarráð hefur samþykkt tvær tillögur um aðgerðir sem miða að því að blása til sóknar í menntamálum Reykjavíkurborgar til að bæta námsárangur í lesskilningi, stærðfræði og vísindalæsi í leik- og grunnskólum.
Í niðurstöðum PISA könnunarinnar sem kynnt var 7. september síðastliðinn kemur fram að frammistaða íslenskra nemenda er undir meðaltali OECD-ríkja og síðri en frammistaða jafnaldra þeirra annars staðar á Norðurlöndunum á öllum þremur sviðum rannsóknarinnar. Jafnframt kemur fram að nemendur í Reykjavík eru yfir landsmeðaltali. Niðurstöðurnar kalla á náið samtal við kennara og annað starfsfólk um framtíð skólamála í Reykjavík.
Mótun tillagna til að bæta námsárangur
Tillaga var samþykkt í borgarráði um að fela skóla- og frístundasviði að móta og leggja fram tillögur að aðgerðum sem miða að því að bæta námsárangur í lesskilningi, stærðfræði og vísindalæsi.
Í umræðu sem fram fór við kynningu PISA-niðurstaðna var lögð áhersla á að árangur í menntakerfinu byggist á markvissum og langtímamiðuðum aðgerðum. Þar voru sérstaklega nefnd snemmtæk íhlutun, öflug eftirfylgni með námsframvindu, styrking íslensku sem annars máls og fagleg forysta innan skóla. Einnig var bent á mikilvægi þess að tryggja samræmd vinnubrögð og jafnan aðgang nemenda að stuðningi óháð skóla eða bakgrunni.
Þessar áherslur eru í góðu samræmi við Menntastefnu Reykjavíkurborgar til 2030 þar sem lögð er áhersla á farsæld barna, jöfn tækifæri, inngildandi skólastarf og að ákvarðanir byggi á þekkingu og markvissri eftirfylgni. Þær eru því áfram mikilvægur grunnur við túlkun nýrra niðurstaðna og mótun aðgerða til framtíðar. Skóla- og frístundasviði er falið að leggja fram tillögur að aðgerðum sem miða að því að bæta námsárangur í lesskilningi, stærðfræði og vísindalæsi.
Tillögurnar skulu fyrst lagðar fram í skóla- og frístundaráði og leikskóla- og daggæsluráði eigi síðar en fyrir lok nóvember næstkomandi og í framhaldi fyrir borgarráð og til umræðu í borgarstjórn.
Stórsókn í menntamálum Reykjavíkurborgar
Borgarráð samþykkti enn fremur tillögu um að stofnað verði til samtals, við kennara og annað starfsfólk í leik- og grunnskóla, um sókn Reykjavíkurborgar í menntamálum. Með samvinnu aðila verði leitað leiða til að efla leik- og grunnskóla eins og kostur er og blása í kjölfarið til stórsóknar í menntamálum. Með því að taka vel utan um þessa málaflokka er ætlunin að gera líf fjölskyldna í borginni betra. Á meðal verkefna verði málstofa í Tjarnarsal Ráðhússins á haustönn með kennurum og öðru starfsfólki í leik- og grunnskóla þar sem yfirskriftin verður: Hvernig komum við skólastarfi í Reykjavík í fremstu röð?
Í kjölfar málstofunnar verði unnin einföld samantekt og aðgerðaráætlun sem lögð verði fyrir skóla- og frístundaráð og leikskóla- og daggæsluráð sem jafnframt yrði rædd í borgarstjórn. Vinnuna leiði Björg Magnúsdóttir forseti borgarstjórnar ásamt Bjarna Fritzsyni formanni skóla- og frístundaráðs og Sigrúni Ástu Einarsdóttur formanni leikskóla- og daggæsluráðs, í samstarfi við skóla- og frístundasvið.
Björg segir það mikilvægast á kjörtímabilinu að efla skólakerfið í Reykjavík og koma því í fremstu röð.
„ Við viljum auka námsárangur barnanna okkar og að skólarnir séu eftirsóttir vinnustaðir. Þetta er stórt markmið og til að ná því þurfum við að eiga virkt og gott samtal; kennarar og starfsfólk í leik- og grunnskólum borgarinnar, foreldrar, Skóla- og frístundasvið og kjörnir fulltrúar. Við hlökkum til að blása til sóknar með því að bjóða öflugan hóp velkominn til samtals í Ráðhúsinu," segir Björg Magnúsdóttir, forseti
Athugasemdir