Matorka ehf. tilkynnti Matvælastofnun um strok bleikju úr eldisstöð sinni að Húsatóftum við Grindavík að morgni laugardagsins 11. apríl 2026 en þetta kemur fram í tilkynningu MAST.

Fiskurinn var að meðaltali um 600 grömm að þyngd og áætlar fyrirtækið að um 500 fiskar hafi sloppið.

Viðbragðsáætlun vegna stroks var virkjuð samstundis. Talið er að rist á útfalli kers hafi gefið sig vegna tæringar, með þeim afleiðingum að fiskurinn komst út í sjó með frárennsli. Viðgerð var framkvæmd án tafar og jafnframt var hafist handa við að yfirfara ástand annarra kerja.

Að mati fyrirtækisins eru litlar líkur á að bleikjan sem slapp geti lifað af í fullsöltum sjó. Matvælastofnun er með málið til rannsóknar og mun birta eftirlitsskýrslu þegar henni lýkur.