Félagið Ísland-Palestína biðlar til fólks um að mæta í kröfugöngu verkalýðshreyfingarinnar á morgun, 1. maí í þeim tilgangi að sína samstöðu með palestínsku þjóðinni.
Í tilkynningu frá félaginu segir að þrátt fyrir að stjórnvöld víða um heim hafi brugðist Palestínumönnum á undanförnum árum hafi verkafólk sýnt samstöðu með þeim. Bent er á verkföll hafnarverkamanna í Evrópu sem miðuðu að því að stöðva vopnasendingar til Ísraels, auk þess sem minnt er á fjölmennan kröfufund hér á landi síðasta haust undir yfirskriftinni „Þjóð gegn þjóðarmorði“.
Félagið segir almenning láta málefni Palestínu sig varða og telur að atburðir þar endurspegli þróun sem geti haft áhrif víðar í heiminum. Í tilkynningunni er einnig bent á að aukinn hernaðarrekstur hafi áhrif á daglegt líf fólks, meðal annars með hækkandi verði á eldsneyti og matvöru.
Félagið leggur áherslu á að baráttan fyrir frjálsri Palestínu sé samofin verkalýðsbaráttu á heimsvísu og hyggjast félagar fjölmenna í gönguna með palestínska fána á lofti.
Fram kemur í tilkynningunni að þeir sem vilja taka þátt geta nálgast fána í verslun félagsins í Hafnarstræti í Reykjavík á hádegi 1. maí, meðan birgðir endast. Safnast verður saman á Skólavörðuholti klukkan 13 og gengið af stað hálftíma síðar. Að göngu lokinni verður boðið upp á kaffi og samveru.
