Kólumbískur maður hefur verið dæmdur í fimm ára fangelsi fyrir hnífaárás á föður barnsmóður sinnar en þetta kemur fram á Vísi.

Dómur í málinu var kveðinn upp í Héraðsdómi Reykjavíkur í lok mars, en árásin átti sér stað aðfaranótt 19. október síðastliðins.

Samkvæmt dómi braust maðurinn inn á heimili fyrrum tengdaföður síns, kom að honum sofandi og stakk hann ítrekað í höfuð og líkama með hnífi. Maðurinn var sakfelldur fyrir tilraun til manndráps.

Ástæðan fyrir árásinni var sögð sú að maðurinn taldi fyrrum tengdaföður sinn hafa brotið kynferðislega á barni hans.

Tími sem maðurinn hefur setið í gæsluvarðhaldi verður dreginn frá fangelsisrefsingunni. Þá voru fíkniefni og vopn í eigu hans gerð upptæk.

Auk fangelsisdómsins var honum gert að greiða fórnarlambinu 2,5 milljónir króna í miskabætur og rúmar sjö milljónir króna í sakarkostnað.