Dánarorsök Joshua Blackledge, áhrifavalds sem hafði náð miklum vinsældum á TikTok, hefur nú verið opinberuð þremur mánuðum eftir andlát hans.
Joshua, sem var aðeins 16 ára, tók sitt eigið líf þann 18. mars, samkvæmt skjölum sem Us Weekly hefur undir höndum. Í skjölunum kemur fram að bangsi, handskrifað bréf og ljósmynd fundust á vettvangi heima hjá honum í Newport í Norður-Karólínu, þar sem fjölskyldumeðlimur fann hann látinn.
Engin vímuefnatengd áhöld fundust á staðnum, samkvæmt skjölunum, en fjölskylda hans greindi frá því að Joshua hefði sýnt „hegðunarbreytingar“ síðastliðið ár.
Unglingurinn hafði safnað yfir einni milljón fylgjenda á TikTok og birti sína síðustu færslu fjórum dögum fyrir andlát sitt, þar sem hann sýndi hvítan pallbíl. Hann var þekktur fyrir myndbönd sem veittu innsýn í líf hans sem menntaskólanema, þar sem hann sýndi oft bíla, eyddi tíma með vinum eða hreyfði varirnar undir lögum.
Í minningargrein sem Noe-Brooks útfaraþjónustan birti skömmu eftir andlát hans, var greint nánar frá lífi hans sem nemanda í 11. bekk, þar sem hann tók þátt í glímu og frjálsum íþróttum.
„Hann hafði brennandi áhuga á útivist og elskaði að vera nálægt vatni, hvort sem það var við veiðar eða á báti með vinum. Hann hafði líka mikla ástríðu fyrir bílum og pallbílum,“ stóð í minningargreininni. „Heima hjá sér hjálpaði Joshua mömmu sinni við eldamennsku, garðvinnu og önnur heimilisverk. Hann var orkumikill og skemmtilegur, og sló oft í gegn með bakföllum sínum.“
„Joshua verður minnst af þeim sem þekktu hann fyrir lífsgleði sína og kraft,“ hélt greinin áfram. „Megi minningin um hann veita þeim huggun sem syrgja hann.“
Ef einstaklingar glíma við sjálfsvígshugsanir er bent er á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
