Danski fréttaljósmyndarinn Klaus Thymann hefur verið handtekinn í Úganda vegna meintra brota sem tengjast náttúruvernd, að sögn yfirvalda í landinu. Handtakan hefur vakið áhyggjur meðal mannréttinda- og fjölmiðlasamtaka sem telja að hún tengist störfum hans við umfjöllun um umhverfismál.
Samkvæmt upplýsingum frá AFP var Thymann handtekinn á mánudag þegar hann átti fund með yfirvöldum vegna leyfa fyrir rannsóknar- og myndvinnu sinni í Rwenzori-fjöllunum, sem eru á heimsminjaskrá UNESCO. Yfirvöld hafa staðfest handtökuna en ekki gefið upp nákvæmar ástæður hennar.
Thymann er þekktur fyrir verðlaunaða umfjöllun um loftslagsbreytingar og áhrif þeirra á náttúruna. Hann greindi nýverið frá erfiðleikum við að fá starfsleyfi í Úganda þrátt fyrir að vera með viðurkenningu sem blaðamaður. Í færslu á samfélagsmiðlinum X sagðist hann hafa verið neitað um aðgang að heimsminjasvæðinu og jafnframt fengið þær upplýsingar að hann væri eftirlýstur.
Umhverfisverndarsamtökin CECIC telja að handtakan tengist vinnu hans við að skrásetja hratt minnkandi jökla í Rwenzori-fjöllunum. Samtökin segja að viðbrögð stjórnvalda bendi til þess að verið sé að refsa blaðamennsku fremur en að rannsaka raunverulegt brot.
Málið kemur upp aðeins nokkrum dögum eftir að yfirmaður hers Úganda, Muhoozi Kainerugaba, sonur forsetans Yoweri Museveni, fyrirskipaði lokun starfsemi stærsta óháða fjölmiðlahóps landsins, Nation Media Group. Kainerugaba skrifaði meðal annars á samfélagsmiðlum að hann tryði ekki á frjálsa fjölmiðlun.
