Dorrit Moussaieff, fyrrverandi forsetafrú Íslands, segir í pistli á Vísi að Íslendingar eigi að ganga ákveðnir til mögulegra viðræðna við Evrópusambandið og gera skýrar kröfur um yfirráð yfir auðlindum þjóðarinnar.

Dorrit fjallar um málið í grein þar sem hún rifjar upp fyrstu tólf ár ævi sinnar í Jerúsalem. Þar hafi hún meðal annars varið miklum tíma í verslun föður síns, þar sem hún lærði ung að semja um verð og viðskipti.

Hún segir reynsluna hafa kennt sér að allt sem tengist viðskiptum og fjármálum sé samningsatriði. Að hennar mati eigi fólk að hefja samningaviðræður á því að fara fram á allt sem það vill og meira til. Að semja ekki sé í raun að tapa áður en leikurinn hefst.

Dorrit telur að Ísland eigi að útbúa ítarlegan kröfulista gagnvart Evrópusambandinu. Þar eigi að leggja sérstaka áherslu á að yfirráð yfir vatni, orku og fiskveiðiauðlindinni verði áfram í höndum Íslendinga.

Hún telur jafnframt að Evrópusambandið þurfi á Íslandi að halda, jafnvel meira en Ísland þurfi á sambandinu að halda.

Íslendingar eigi því að hlusta á hvað Evrópusambandið sé tilbúið að bjóða og leggja síðan fram eigin kröfur. Verði öllum skilyrðum Íslands mætt geti þjóðin tekið ákvörðun um framhaldið.

Dorrit segir að lokum mikilvægt að Ísland læri af mistökum Bretlands í samskiptum þess við Evrópusambandið.