Foreldrar frá London skildu fimm ára son sinn eftir í bifreið á bílastæði við Eldgjá í Skaftártunguafrétti á Suðurlandi í gær á meðan þau gengu að Ófærufossi. Íslensk kona kom að drengnum grátandi á bílastæðinu og tók hann til sín þar til foreldrarnir komu aftur.

Greint er frá atvikinu í Facebook-hópnum Bakland ferðaþjónustunnar. Þar segir að foreldrarnir, sem eru erlendir ferðamenn, hafi skilið drenginn eftir í bílnum á meðan þau héldu að Ófærufossi í Nyrðri-Ófæru, sem fellur ofan í Eldgjá.

„Drengurinn fannst grátandi á planinu við ána, ég tók hann inn og róaði hann,“ segir konan sem kom að drengnum.

Foreldrarnir fundust síðar. Að sögn konunnar sagði faðir drengsins að fjölskyldan hefði áður skilið hann eftir með sambærilegum hætti án þess að vandamál hefðu komið upp. Fjölskyldan yfirgaf síðan svæðið í bifreið sinni.

Íris Edda Heimisdóttir, aðalvarðstjóri hjá lögreglunni á Suðurlandi, segir við Vísi málið þó ekki enn hafa borist formlega á borð lögreglunnar þar en samkvæmt landvörðum á svæðinu hefur það verið tilkynnt.