Ein eftirminnilegasta flugvél í sögu íslensks flugs, Boeing 757-þotan Hekla Aurora, er nú rifin niður á Spáni eftir rúmlega þriggja áratuga þjónustu. Vélin varð heimsþekkt meðal flugáhugafólks fyrir sérstakt útlit sitt í litum norðurljósanna.

Flugáhugamannasíðan henaviation birti nýverið myndir af niðurrifi vélarinnar og kvaddi hana með hlýjum orðum.

„Einu sinni flaug hún um himinhvolfin í einu fallegasta litaskema sem gert hefur verið og bar með sér brot af norðurljósum Íslands um heiminn,“ skrifar Hendrik. Hann segir sorglegt að sjá vélina nú tekna í sundur og að jafnvel þekktustu flugvélar komist að lokum á endastöð.

Hún kom til Icelandair árið 2004 og var máluð í norðurljósalitunum í lok árs 2014.

Vélin varð í kjölfarið eitt þekktasta tákn flugflota Icelandair og vakti athygli á flugvöllum víða um heim. Innréttingar og lýsing vélarinnar voru jafnframt útfærðar með norðurljósin að leiðarljósi.

Hekla Aurora lauk ferli sínum hjá Icelandair í október 2025. Vélinni var síðar flogið til Spánar þar sem hún var geymd þar til niðurrif hófst í september.

Með niðurrifinu lýkur sögu einnar þekktustu og sérstæðustu flugvélar Íslands