Þorbjörg S. Gunnlaugsdóttir, dómsmálaráðherra, hefur ákveðið að leggja til við forseta Íslands að Eiríkur Elís Þorláksson verði skipaður dómari við Landsrétt frá 1. september 2026 og að Hildur Briem verði skipuð dómari við Landsrétt frá 5. október 2026.
Þetta kemur fram í tilkynningu frá stjórnvöldum.
Eiríkur Elís Þorláksson lauk embættisprófi í lögfræði frá Háskóla Íslands árið 2001 og LL.M.- námi við King´s College í London árið 2008. Hann öðlaðist réttindi til málflutnings í héraði árið 2002 og fyrir Hæstarétti árið 2008. Þá lauk hann prófi til að teljast hæfur stjórnarmaður í vátryggingafélagi 2011.
Að loknu embættisprófi starfaði Eiríkur Elís um hríð hjá óbyggðanefnd en hóf árið 2002 störf á lögmannastofu þar sem hann starfaði til ársins 2011, þar af sem meðeigandi frá 2004. Frá 2012 hefur hann starfað við lagadeild Háskólans í Reykjavík, fyrst sem lektor en sem dósent frá 2017, auk þess sem hann hefur sinnt lögmannsstörfum samhliða á þeim tíma. Frá mars 2019 til apríl 2024 gegndi hann starfi deildarforseta lagadeildar Háskólans í Reykjavík auk þess að sinna kennslu við aðra háskóla. Þá var hann settur dómari við Landsrétt samtals í um fjögurra mánaða skeið á árunum 2024 og 2025, og var varadómandi í Endurupptökudómi 2021 - 2026.
Eiríkur Elís hefur jafnframt ritað fræðibækur í lögfræði og fjölda ritrýndra fræðigreina og setið í stjórnum ýmissa félaga, svo sem Tryggingamiðstöðvarinnar hf. og Stoða hf., í stjórn Bókaútgáfunnar Codex og gerðardóms Viðskiptaráðs Íslands, þar af sem formaður frá 2022 til 2024. Eiríkur hefur verið settur dómari við Landsrétt frá 5. janúar 2026.
Hildur Briem lauk embættisprófi í lögfræði frá Háskóla Íslands árið 2000, LL.M.- námi við Háskólann í Lundi árið 2005 og viðbótardiplómu í opinberri stjórnsýslu frá Háskóla Íslands árið 2022. Hún öðlaðist réttindi til að flytja mál fyrir héraðsdómi árið 2001. Að loknu embættisprófi starfaði hún sem fulltrúi lögreglustjórans í Reykjavík á ákærusviði embættisins en hóf störf hjá umboðsmanni Alþingis árið 2005 og starfaði þar til ársins 2008 þegar hún varð aðstoðarmaður dómara við Héraðsdóm Austurlands.
Hún var skipuð í embætti héraðsdómara og dómstjóra við Héraðsdóm Austurlands árið 2011 en árið 2018 fluttist hún í Héraðsdóm Reykjavíkur og hefur verið dómari þar síðan fyrir utan að hún var settur landsréttardómari í um sex mánaða skeið árið 2021.Hún hefur verið settur varadómari í Hæstarétti í fjórum málum og verið dómandi við Endurupptökudóm frá því í febrúar 2025.
Hildur hefur sinnt stundakennslu í stjórnsýslurétti við lagadeild Háskóla Íslands í um fjögurra ára skeið og setið í áfrýjunarnefnd ágreiningsmála á kirkjulegum vettvangi frá árinu 2016 og setið í stjórn Dómarafélags Íslands. Þá hefur hún tekið sæti í nokkrum málum hjá kærunefnd útboðsmála og verið skipuð í nefnd dómstólasýslunnar um réttarfar og skilvirkni dómstóla.
