Eiríkur Rögnvaldsson, uppgjafa prófessor í íslenskri málfræði, sakar andstæðinga aðildar Íslands að Evrópusambandinu um að beita blekkingum í umræðunni fyrir komandi þjóðaratkvæðagreiðslu um áframhaldandi aðildarviðræður.
Í Facebook-færslu gagnrýnir hann fullyrðingar um að Íslendingar gætu orðið kvaddir í svonefndan Evrópuher ef landið gengi í Evrópusambandið.
„Eitt af því sem Evrópusambandsandstæðingar nota til að fæla almenning frá því að segja já í atkvæðagreiðslunni í haust eru fullyrðingar um að hætta sé á að Íslendingar yrðu kvaddir í Evrópuher sem til standi að stofna. Til að rökstyðja þetta hika þeir ekki við að beita blekkingum og dreifa t.d. meðfylgjandi mynd þar sem haft er eftir Ursulu van Leyen að ESB sé „að byggja upp herafla“,“ skrifar Eiríkur.
Hann segir tilvitnunina ekki standast skoðun og vísar til þess sem Ursula von der Leyen, forseti framkvæmdastjórnar Evrópusambandsins, sagði á fundinum sem vitnað er til.
„En það sagði hún alls ekki á þeim fundi sem vísað er til. Það sem hún sagði var „we are building up to be a military powerhouse“. Í íslensku þýðingunni er orðinu „herafla“ skotið inn án þess að það eigi sér nokkra stoð í frumtextanum. Það heitir fölsun,“ skrifar Eiríkur.
