Slökkvilið Fjarðabyggðar stóð frammi fyrir annasömu kvöldi í gær þegar það var kallað út vegna elds í skemmu við bæinn Neðri-Skálateig í Norðfjarðarsveit, á sama tíma og fjögur sjúkraútköll komu upp.

Ingvar Georg Georgsson, slökkviliðsstjóri Fjarðabyggðar, segir í samtali við Austurfrétt, sjaldgæft að slík atvik falli saman en hrósar viðbragðsaðilum fyrir skjót og fumlaus viðbrögð.

„Það er ekki algengt að við fáum marga sjúkraflutninga ofan í eldsvoða en sem fer betur búum við vel að því að hafa gott fólk og gott viðbragð,“ segir hann.

Þegar slökkviliðið kom á vettvang var skemman þegar alelda. Að sögn Ingvars var það lán í óláni að tveir slökkviliðsmenn voru staddir nálægt slökkvistöðinni í Neskaupstað og gátu lagt af stað strax. Fyrsti slökkvibíllinn var því kominn á vettvang aðeins níu mínútum eftir að útkallið barst.

Slökkvistarfið beindist fyrst og fremst að því að verja nærliggjandi byggingar og tókst það, en skemman sjálf eyðilagðist. Í henni voru meðal annars bifreið, hestakerra og ýmis tæki sem notuð voru við búrekstur.

Ekki liggur enn fyrir hvað olli eldinum. Slökkvistarfið stóð yfir í rúmar þrjár klukkustundir. Þar sem bárujárnsþak skemmunnar hrundi þurfti að kalla til kranabíl svo hægt væri að fjarlægja járnið og komast að glæðum undir því. Auk slökkvibíla frá Neskaupstað kom dælubíll frá Reyðarfirði á vettvang ásamt sjúkrabifreið.

Fjórir sjúkrabílar í verkefnum samtímis

Á meðan eldsvoðinn stóð yfir bárust einnig þrjú önnur sjúkraútköll. Tvö þeirra voru leyst af stöðinni á Reyðarfirði og eitt frá Fáskrúðsfirði. Með sjúkrabifreiðinni sem var send vegna brunans voru því fjórir sjúkrabílar í verkefnum á sama tíma.

„Viðbragðið var sérstaklega gott miðað við að það er hásumar og margt fólk í fríi,“ segir Ingvar.

Síðar um daginn sinnti slökkviliðið einnig sjúkraflutningi frá sjúkrahúsinu í Neskaupstað á Norðfjarðarflugvöll, þar sem sjúklingur var afhentur þyrlu Landhelgisgæslunnar til flutnings til Reykjavíkur.