Fyrrum enski landsliðsframherjinn Darren Bent segir að hann hafi hafnað félagaskiptum til West Ham sumarið 2007 eftir að eigendur félagsins settu honum úrslitakosti um að skrifa strax undir samning. Bent endaði þess í stað hjá Tottenham Hotspur fyrir metfé á þeim tíma.
Bent greindi frá þessu í hlaðvarpinu In The Mixer. Þar rifjaði hann upp að Alan Curbishley, þáverandi knattspyrnustjóri West Ham, hafi lagt mikla áherslu á að fá hann til félagsins árið 2007.
Framherjinn var þá í fríi í Miami þegar West Ham hafði samband og bauð honum að fljúga heim fyrr til að ræða samning. Bent segir félagið hafa greitt ferðina og að hann hafi samþykkt að koma heim af virðingu við Curbishley, sem hafði áður stýrt honum hjá Charlton.
Á þessum tíma voru Björgólfur Guðmundsson og Eggert Magnússon eigendur West Ham og að sögn Bent voru miklir fjármunir í umferð hjá félaginu.
Bent segir þó að fundurinn með eigendum félagsins hafi farið illa. Hann hafi óskað eftir sólarhring til að ræða málin við föður sinn áður en hann tæki ákvörðun, enda hafi Tottenham einnig haft áhuga á honum.
Samkvæmt Bent vildu eigendur West Ham hins vegar fá svar tafarlaust og hafi gefið honum þau skilaboð að samningstilboðið yrði dregið til baka ef hann skrifaði ekki undir samstundis.
„Það setti bæði mig og pabba minn út af laginu,“ sagði Bent í viðtalinu. „Þegar við fórum þaðan var umboðsmaðurinn minn farinn að fá skilaboð um að samningurinn væri úr sögunni ef ég vildi ekki skuldbinda mig strax.“
Bent ákvað í kjölfarið að ganga til liðs við Tottenham og skrifaði undir samning við félagið fyrir 16,5 milljónir punda, sem þá var félagsmet hjá Spurs.
Bent var um tíma einn besti framherjinn í ensku úrvalsdeildinni og lék meðal annars 13 landsleiki fyrir England Á ferlinum lék hann meðal annars með Aston Villa, Tottenham, Sunderland, Fulham og Derby County áður en hann lagði skóna á hilluna.
