Björn Leví Gunnarsson, tölvunarfræðingur og fyrrverandi alþingismaður fyrir Pírata bendir borgarstjóra Reykjavíkur á í opinberri færslu að ekki sé hægt að fá greiða sem aðrir þurfi að borga fyrir án þess að það sé gefið upp sem styrkur.
„Stjórnmálamenn geta ekki fengið "greiða" sem aðrir þurfa almennt að borga fyrir án þess að það sé gefið upp sem styrkur til viðkomandi stjórnmálamanns eða flokks samkvæmt lögum um fjármögnun stjórnmálasamtaka.
Ef það er eitthvað greitt fyrir þennan "greiða" þá þarf afsláttur að koma fram - og ef sá afsláttur er umfram það sem aðrir geta fengið, þá verður að skrá mismuninn sem styrk.
Ég ætla að leyfa mér að efast um að svona "greiðar" séu rétt skráðir almennt. Því það var mjög oft sem maður heyrði af því að sumir flokkar fengu ókeypis lögfræðiálit á alls konar málum.
Eins sagan sem maður heyrði var um einhvern ráðgjafa sem skipti yfir í Viðreisn - og var þá spurður hvernig hann myndi fá einhver verkefni.“
Engum samskiptaverkefnum útvistað
Samskiptastjóra og öllum sex upplýsingafulltrúum Reykjavíkurborgar var sagt upp í síðustu viku. Hildur Björnsdóttir borgarstjóri segir að engum verkefnum hafi verið útvistað í kjölfarið, en hún hafi notið aðstoðar félaga síns við að skrifa fréttatilkynningu um málið, segir í frétt á RÚV. Fulltrúar Samfylkingarinnar í borgarráði lögðu fram fyrirspurn á fundi í gær þar sem óskað var eftir svörum um hvernig upplýsingamálum borgarinnar yrði háttað eftir umfangsmiklar uppsagnir á skrifstofu samskipta og viðburða. Hildur Björnsdóttir borgarstjóri viðurkennir að samskiptamálin hafi verið snúin eftir að sex upplýsingafulltrúum og samskiptastjóra var sagt upp. Hún hafi því leitað ráðgjafar í kringum sig.
Ókeypis aðstoð frá varaborgarfulltrúa
Borgarstjóri naut liðsinnis Más Mássonar við skrif á fréttatilkynningu um uppsagnirnar. Már er annar eigandi ráðgjafarskrifstofunnar Athygli og varaborgarfulltrúi Sjálfstæðisflokksins. Hildur tekur fram að um vinagreiða hafi verið að ræða og ekkert verði greitt fyrir þjónustuna.„Ég hélt á þessum málum í meginatriðum sjálf. Ég leitaði mér ráðgjafar fólks í kringum mig en það voru bara vinagreiðar og ekkert sem greitt er fyrir,“ segir Hildur og ítrekar að engum verkefnum hafi verið útvistað.Hins vegar hefur verið samið við tvo starfsmenn um að brúa bilið og vinna fram að áramótum á meðan unnið er að nýju fyrirkomulagi. Engir nýir upplýsingafulltrúar hafa verið ráðnir.
Framtíðarfyrirkomulag óákveðið
Að sögn Hildar hefur ekki verið tekin ákvörðun um hvort upplýsingamálum borgarinnar verði útvistað til einkafyrirtækja í framtíðinni. Nýtt fyrirkomulag verði kynnt innan tíðar.Hún bendir á að skrifstofa borgarstjóra og borgarritara hafi í gegnum árin útvistað ýmsum verkefnum tengdum ráðgjöf og stefnumótun. Það hafi forverar hennar gert og eflaust verði það gert að einhverju leyti aftur, en málið sé ekki komið til skoðunar.
Mágkonan starfar hjá Athygli
Spurð að því hvort almannatengslastofan Athygli komi til greina í framhaldinu segir Hildur að skoða þurfi hvaða stofur hæfa hverju sinni, en engar ákvarðanir liggi fyrir.Ólöf Skaftadóttir, mágkona borgarstjóra, starfar hjá Athygli. Aðspurð hvort þau tengsl kunni að teljast tortryggileg segist Hildur ekki hafa leitt hugann að því, enda hafi viðskipti við fyrirtækið ekki verið til skoðunar.
