Félagið Ísland – Palestína skorar á Körfuknattleikssamband Íslands (KKÍ) að leika ekki við landslið Ísraels í undankeppni EM karla í ágúst næstkomandi. Leikurinn er samkvæmt mótaskrá KKÍ á dagskrá 28. ágúst 2025.
Í áskorun félagsins er bent á að Palestínumenn hafi kallað eftir alþjóðlegri sniðgöngu gegn Ísrael á sviði íþrótta, viðskipta og menningar til að mótmæla þjóðarmorði og brotum á mannréttindum Palestínumanna. Félagið telur að KKÍ eigi að fylgja fordæmi íþróttahreyfingarinnar sem hafi útilokað Rússa og Belarússa frá mótum vegna árásarinnar á Úkraínu. Í áskorunninni segir meðal annars:
„Ísrael hefur brotið alþjóðalög - Ísrael hefur með framferði sínu brotið lög og samninga um mannréttindi sem gilda í milliríkjasamskiptum og kveðið er á í Stofnsamþykkt Sameinuðu þjóðanna.
- Ísrael hefur hersetið land Palestínumanna í 78 ár.
- Ísrael hefur byggt ólöglegar landtökubyggðir á landi Palestínu og Sýrlands. - Ísrael hefur drepið a.m.k. 60,000 Gazabúa, þar af yfir 20,000 börn í yfirstandandi árás. Þúsundir eru enn grafin undir rústum heimila sinna. Bandarískir læknar sem hafa starfað á Gaza telja að allt að 119,000 Gazabúar hafi fallið og þar af um 67,000 vegna hungurs og vosbúðar. (https://www.gazahealthcareletters.org/usa-letter-oct-2-2024)
- Ísrael ræðst gegn stofnunum SÞ, hindrar starfsemi þeirra, eyðileggur eignir og drepur starfsmenn samtakanna.
- Ísrael eyðileggur sjúkrahús bæði á Gaza og í Líbanon, drepur og handtekur lækna, hjúkrunarfræðinga og annað starfsfólk heilsgæslunnar á Gaza. - Flugskeytaárásir og stórskotalið Ísraelshers hefur eyðilagt rúmlega helming sjúkrahúsa á Gaza, 87% heimila, 88% skóla, 75% allra samgöngumannvirkja og 68% landbúnaðarsvæða á Gaza eru ónothæf.
- Ísrael hindrar aðflutning matar, lyfja, vatns, og annarra nauðþurfta til íbúa Gaza.“
Vísar í alþjóðadómstóla og mannréttindasamtök
Í áskoruninni er vísað til nýlegra niðurstaðna alþjóðlegra dómstóla og mannréttindasamtaka sem hafa lýst hernaði Ísraels sem líklegu þjóðarmorði og ólöglegu hernámi. Þar kemur meðal annars fram að Aljóðlegi sakamáladómstóllinn (ICC) hafi gefið út handtökuskipun á hendur forsætisráðherra Ísraels og fyrrum varnarmálaráðherra vegna hungurs sem vopns í hernaði, sem telst glæpur gegn mannúð.
Jafnframt er bent á að íþróttamannvirki á Gaza hafi í stórum stíl verið eyðilögð, yfir 270 palestínskir íþróttamenn drepnir og meirihluti sjúkrahúsa, skóla og heimila á svæðinu lagður í rúst.
Kallar eftir samfélagslegri ábyrgð
Félagið hvetur KKÍ til að sýna samfélagslega ábyrgð í samræmi við lög Íþrótta- og Ólympíusambands Íslands, sem leggja áherslu á virðingu fyrir alþjóðlegum mannréttindum.
„Forysta KKÍ stendur frammi fyrir mikilvægri ákvörðun; að leika gegn liði Ísraels og skaða þar með íþróttahreyfinguna með því að sinna ekki ákalli fórnarlamba þjóðarmorðs. Eða að starfa skv. lögum Íþrótta- og Olympíusambands Íslands með því að sýna samfélagslega ábyrgð og virða og efla mannréttindi. ,“ segir að lokum í yfirlýsingu félagsins.
Undir áskorunina skrifar formaður Félagsins Ísland-Palestína, Hjálmtýr Heiðdal.
