Nokkuð var um verkefni hjá lögreglunni á höfuðborgarsvæðinu í gærkvöldi og í nótt, meðal annars vegna þjófnaða, fíkniefnamála og umferðarlagabrota.

Nokkrir einstaklingar voru kærðir fyrir þjófnaði úr verslunum og þá barst lögreglu tilkynning um innbrot í fyrirtæki. Einnig var einstaklingur kærður fyrir vörslu fíkniefna.

Tveir einstaklingar voru handteknir vegna gruns um söludreifingu fíkniefna og ólöglega dvöl í landinu. Ekki kemur fram í dagbók lögreglu hversu mikið magn fíkniefna var um að ræða eða nánari upplýsingar um málið.

Lögregla hafði jafnframt afskipti af nokkrum ökumönnum vegna umferðarlagabrota. Ökumaður var kærður fyrir að aka sviptur ökurétti og nokkrir voru kærðir fyrir of hraðan akstur. Meðal annars mældist ökumaður á 117 kílómetra hraða þar sem hámarkshraði er 80 kílómetrar á klukkustund og annar á 120 kílómetra hraða þar sem hámarkshraði er 90.

Þá voru alls fjórir ökumenn handteknir vegna gruns um akstur undir áhrifum áfengis og/eða fíkniefna. Tveir þeirra reyndust jafnframt sviptir ökuréttindum.

Lögregla sinnti einnig umferðarslysi þar sem ekið var á vegfaranda á rafmagnshlaupahjóli. Viðkomandi var fluttur á slysadeild en samkvæmt upplýsingum lögreglu voru áverkar hans taldir minni háttar.