Lögreglan á höfuðborgarsvæðinu hafði í mörg horn að líta í gærkvöldi og nótt en alls voru 99 mál skráð á tímabilinu frá klukkan 17:00 til 05:00. Fjölmörg mál tengdust líkamsárásum, þjófnuðum, fíkniefnum og óspektum.

Meðal verkefna lögreglu var aðstoð í verslun í miðborginni vegna þjófnaðar, en málið var afgreitt á vettvangi. Þá var einstaklingur handtekinn grunaður um líkamsárás og vistaður í fangaklefa.

Í verslunarmiðstöð í Reykjavík var maður stöðvaður vegna þjófnaðar, en hann reyndist jafnframt vera með fíkniefni í fórum sínum. Honum var sleppt að lokinni skýrslutöku.

Lögregla handtók einnig mann eftir eftirför sem hófst þegar lögreglumenn hugðust stöðva bifreið hans. Ökumaðurinn ók á brott og jók hraða áður en lögreglu tókst að króa hann af. Maðurinn yfirgaf þá bifreiðina og reyndi að flýja fótgangandi en var handsamaður skömmu síðar. Hann er grunaður um sölu og dreifingu fíkniefna auk þess að vera í ólöglegri dvöl hér á landi. Hann var vistaður í fangaklefa.

Þá voru tveir einstaklingar handteknir í miðborg Reykjavíkur vegna annars vegar eignaspjalla og líkamsárásar og hins vegar vörslu fíkniefna og þess að neita að framvísa skilríkjum.

Í öðru máli var óskað eftir aðstoð lögreglu vegna erlends ferðamanns sem fannst klæddur einungis nærfötum utandyra. Maðurinn hafði ráfað frá hóteli sínu og tókst ekki að finna dvalarstað hans þrátt fyrir ítrekaðar tilraunir. Honum var því útvegað næturgisting í fangageymslu.

Lögregla sinnti einnig útkalli vegna umferðaróhapps í Hafnarfirði þar sem bifreið var ekið á vegrið. Engin slys urðu á fólki en bifreiðin skemmdist mikið.

Þá var óskað eftir aðstoð lögreglu í iðnaðarhúsnæði í Hafnarfirði eftir að einstaklingur féll niður stiga. Viðkomandi var fluttur með sjúkrabifreið á bráðamóttöku til aðhlynningar.

Auk þessa hafði lögregla virkt eftirlit með samkvæmi Hells Angels og handtók einn einstakling í Árbænum vegna hótana. Sá var einnig vistaður í fangaklefa.