Lögreglan á höfuðborgarsvæðinu hafði í ýmsu að snúast í morgun og þurfti meðal annars að hafa afskipti af nokkrum ökumönnum vegna umferðarlagabrota. Einn þeirra mældist á 125 kílómetra hraða þar sem hámarkshraði er 90 kílómetrar á klukkustund.

Þetta kemur fram í dagbók lögreglunnar á höfuðborgarsvæðinu í dag.

Afskipti voru höfð af nokkrum ökumönnum í morgun vegna ólíkra brota. Auk hraðaksturs voru ökumenn stöðvaðir vegna aksturs gegn rauðu ljósi, aksturs án ökuréttinda og gruns um akstur undir áhrifum áfengis.

Lögreglu barst jafnframt tilkynning um umferðarslys þar sem vespu hafði verið ekið á annað ökutæki. Smávægileg meiðsl urðu í slysinu.

Þá hafði lögregla afskipti af ökumanni sem tók myndband af slysstað á meðan hann ók fram hjá vettvangi.

Karlmaður var fluttur á slysadeild eftir alvarlega líkamsárás í heimahúsi í Kópavogi í dag, en tilkynning um málið barst um þrjúleytið. Einn hefur verið handtekinn, en rannsókn málsins er á algjöru frumstigi.

Ýmis önnur verkefni komu inn á borð lögreglu. Tilkynnt var um þjófnað á reiðhjóli og lögregla aðstoðaði sjúkraflutningsmenn við störf þeirra.

Einnig var haft afskipti af manni sem var í annarlegu ástandi og einum ölvuðum einstaklingi var vísað út úr húsi.

Þá barst lögreglu hávaðakvörtun eldsnemma í morgun.