Lögreglan á höfuðborgarsvæðinu hafði í nógu að snúast frá því í gærkvöldi og fram á nótt. Nokkrir ökumenn voru stöðvaðir vegna gruns um akstur undir áhrifum áfengis eða fíkniefna og lögregla hafði jafnframt afskipti af manni vegna gruns um sölu fíkniefna.

Samkvæmt dagbók lögreglu hafði hún afskipti af einstaklingi sem grunaður var um að selja fíkniefni. Hann var vistaður í fangageymslu í þágu rannsóknar málsins.

Þá var tilkynnt um slys á rafhjóli. Sá sem lenti í slysinu hlaut minniháttar áverka og var fluttur með sjúkrabifreið til aðhlynningar.

Umferðareftirlit lögreglu var umfangsmikið í gærkvöldi og nótt. Þrír ökumenn voru stöðvaðir vegna gruns um að hafa ekið bæði undir áhrifum áfengis og fíkniefna. Einn þeirra er auk þess grunaður um önnur umferðarlagabrot.

Fjórði ökumaðurinn var stöðvaður vegna gruns um ölvun við akstur og sá fimmti vegna gruns um akstur undir áhrifum fíkniefna. Sá síðarnefndi hafði áður verið sviptur ökuréttindum.

Lögregla stöðvaði einnig ökumann sem hafði aldrei öðlast ökuréttindi.

Þá barst lögreglu tilkynning um þjófnað og líkamsárás í matvöruverslun. Ekki koma fram frekari upplýsingar í dagbók lögreglu um málsatvik, hvort einhver hafi slasast eða hvort einhver hafi verið handtekinn vegna málsins.