Á tímabilinu frá klukkan 17:00 til 05:00 skráði lögregla alls 41 mál í kerfum sínum en þetta kemur fram í dagbók lögreglu.

Meðal atvika næturinnar var handtaka einstaklings sem grunaður er um akstur undir áhrifum bæði áfengis og fíkniefna. Viðkomandi reyndist jafnframt vera með fíkniefni í fórum sínum og var bifreið hans gerð upptæk.

Tveir aðilar til viðbótar voru handteknir grunaðir um akstur undir áhrifum fíkniefna. Þeir voru látnir lausir að lokinni blóðsýnatöku.

Tilkynnt var um umferðaróhapp þar sem ökumaður reyndist ölvaður. Hann var fluttur á lögreglustöð til blóðsýnatöku og vistaður í fangaklefa í þágu rannsóknar málsins.

Alls voru átta ökumenn kærðir fyrir of hraðan akstur á tímabilinu.

Lögreglu barst einnig tilkynning um aðila sem þurfti að vísa úr verslun, auk þess sem tilkynnt var um unga drengi sem áttu að hafa verið að kveikja eld. Enginn eldur fannst þegar lögregla kom á vettvang.

Þá var tilkynnt um alvarlega líkamsárás. Tveir einstaklingar voru handteknir í tengslum við málið sem er nú til rannsóknar. Sá sem varð fyrir árásinni er ekki talinn í lífshættu.