Lögreglan á höfuðborgarsvæðinu hafði í nógu að snúast á tímabilinu frá klukkan 17:00 til 05:00, en alls voru 62 mál skráð í kerfum hennar á þeim tíma.

Þrír ökumenn voru handteknir, grunaðir um akstur undir áhrifum fíkniefna. Allir voru þeir látnir lausir að lokinni blóðtöku.

Tilkynnt var um þjófnað í verslun í miðborginni og var málið afgreitt á vettvangi með skýrslutöku. Þá voru níu ökumenn sektaðir fyrir ólöglegar bifreiðastöður.

Í Vesturbæ bárust tilkynningar um hávær lúðrahljóð sem líktust þokulúðrum. Talið er líklegt að um hafi verið að ræða hljóð frá götusópabifreiðum sem voru að störfum í hverfinu.

Einnig barst tilkynning um meint innbrot í íbúð, en við nánari athugun kom í ljós að um var að ræða einstaklinga sem voru að aðstoða húsráðanda við að komast inn á heimili sitt.

Alvarlegasta málið á tímabilinu var tilkynning um stórfellda líkamsárás í Kópavogi. Tveir aðilar voru handteknir og vistaðir í fangageymslu, en málið er nú til rannsóknar. Fórnarlambið var flutt á slysadeild til aðhlynningar.