Lögregla hafði í nógu að snúast í nótt og í gærkvöldi og sinnti meðal annars útköllum vegna meintra innbrota, bruna og umferðarlagabrota. Nokkrir ökumenn voru stöðvaðir vegna gruns um akstur undir áhrifum.

Einn ökumaður var stöðvaður annað kvöldið í röð. Var hann grunaður um akstur undir áhrifum fíkniefna og áfengis auk þess að vera án ökuréttinda. Málið var afgreitt á lögreglustöð.

Annar ökumaður var stöðvaður vegna gruns um vímuakstur og reyndist hann jafnframt hafa verið sviptur ökuréttindum. Þá stöðvaði lögregla þriðja ökumann vegna gruns um vímuakstur og var málið sömuleiðis afgreitt á lögreglustöð. Auk þess var ökumaður stöðvaður fyrir að aka án ökuréttinda.

Lögreglu barst einnig tilkynning um minniháttar umferðaróhapp í hverfi 109. Engin slys urðu á fólki.

Tilkynnt var um innbrot í fyrirtæki og er málið til rannsóknar hjá lögreglu. Þá var tilkynnt um minniháttar bruna sem einnig er til rannsóknar.

Lögregla hafði jafnframt afskipti af einstaklingum í annarlegu ástandi. Einn þeirra var í miðborginni og var honum komið til síns heima. Annar einstaklingur hafði ítrekað komið við sögu lögreglu og hafði lögregla haft afskipti af honum nokkrum sinnum. Var hann að lokum vistaður í fangageymslu.