Norska frjálsíþróttastjarnan Jakob Ingebrigtsen sagði í fjögurra klukkustunda vitnisburði á fyrsta degi réttarhalda, sem lýst hefur verið sem þeim stærstu í sögu Noregs, að faðir hans, Gjert Ingebrigtsen, hafi beitt hann ofbeldi þar til hann varð veikur.

Réttarhöldin, sem munu standa yfir fram í maí, hófust aðeins tveimur dögum eftir að Ingebrigtsen vann tvenn gullverðlaun á HM í innanhússfrjálsíþróttum í Kína. Á meðan á vitnisburðinum stóð lýsti hinn 24 ára gamli hlaupari fjölmörgum áföllum úr æsku, þar sem hann sagðist hafa sætt bæði líkamlegu og andlegu ofbeldi af hendi föður síns.

Gjert, sem gæti átt yfir höfði sér allt að sex ára fangelsisdóm ef hann verður sakfelldur, hefur alfarið neitað ásökununum um ofbeldi. Málið kom fyrst upp á yfirborðið árið 2022 þegar Jakob og eldri bræður hans, Henrik og Filip, hættu að æfa undir stjórn föður síns.

Þeir leituðu síðar til norska dagblaðsins VG til að segja sögur sínar opinberlega, en sögðust hafa gert það til að vernda yngri systur sína, Ingrid. Í einni frásögninni kom fram að hún hafi verið slegin í andlitið með blautu handklæði af föður sínum eftir að hún sagðist ekki vilja fara í hlaup. Í gær var dómstólnum sýnd mynd af Ingrid með sár á andlitinu.

Ingebrigtsen, sem hefur sett fjölda heimsmeta og unnið yfir 30 titla á stórmótum, vísaði til föður síns sem „sakborningsins“ allan sinn vitnisburð.

Í einni frásögn lýsti hann atviki sem átti sér stað þegar hann var aðeins „sjö eða átta ára“:

„Ég stend bara í eldhúsinu og horfi niður á gólfið. Sakborningurinn stendur yfir mér og öskrar á mig. Hann slær mig ítrekað ofan á höfuðið. Ef ég gerði ekki eins og hann vildi, kom hann og niðurlægði mig og lamdi mig þar til ég varð veikur.“

Ingebrigtsen sagði enn fremur frá atviki þar sem Gjert á að hafa sparkað í magann á honum og öðru þar sem hann, ásamt systkinum sínum, sat í bíl á ferð þegar faðir þeirra hótaði að „niðurlægja hann og berja hann til dauða, eða eitthvað álíka“.

Gjert er einnig sagður hafa kallað son sinn meðal annars „helvítis hálfvita“, „þorpara“, „heimskan“, „ómerkilegan“ og „hryðjuverkamann“. Einnig var rifjað upp atvik frá árunum 2014 eða 2015 þar sem hann henti PlayStation-tölvu Jakobs út um glugga á heimili þeirra.

Á miðvikudagsmorgun var gert ráð fyrir að lögfræðiteymi Gjerts myndi yfirheyra Ingebrigtsen. Réttarhöldin halda áfram.

Mirror segir frá málinu.