Matvælastofnun hefur á undanförnum misserum gripið til fjölbreyttra aðgerða vegna brota á lögum um velferð dýra. Málin spanna allt frá vörslusviptingum gæludýra til dagsekta og stjórnvaldssekta á búrekstri og sláturhúsum.
Kettir og hundar fjarlægðir af heimilum
Í nokkrum tilvikum var ákveðið að svipta eigendur vörslu gæludýra vegna alvarlegrar vanrækslu. Í einu máli var köttur fjarlægður af heimili eftir að ill meðferð hafði stefnt lífi hans í hættu. Í öðru tilviki samþykkti umráðamaður kattar að dýrið yrði fjarlægt varanlega vegna slæms aðbúnaðar.
Einnig voru umráðamenn hunds sviptir vörslu hans eftir að lögregla heimsótti heimili þeirra. Þar kom í ljós heilsuspillandi íbúð, slæmur aðbúnaður og ófullnægjandi umönnun hundsins.
Í öðru alvarlegu máli, þar sem eigandi hafði farið í margra vikna ferðalag til útlanda og falið öðrum að annast marga ketti, leiddi eftirlit til þess að nokkrir kettir fundust dauðir. Aðrir kettir voru fjarlægðir af heimilinu í kjölfarið.
Dagsektir vegna vanrækslu í búfjárhaldi
Nokkrir nautgripabændur fengu áminningar og dagsektir vegna frávika í dýrahaldi. Í sumum tilfellum báru dagsektir árangur. Einn bóndi fékk dagsektir upp á 10.000 krónur á dag vegna ófullnægjandi bása og hreinlætis, en bætti úr áður en til innheimtu kom og voru sektir því felldar niður.
Í öðru máli voru dagsektir upp á 7.500 krónur á dag lagðar á bónda vegna skorts á klaufhirðu og ófullnægjandi brynningar og rýmis fyrir gripi. Þá voru einnig lagðar dagsektir upp á 10.000 krónur á dag vegna annarra frávika í búrekstri.
Þegar dagsektir skiluðu ekki árangri í einu máli var gripið til frekari aðgerða og hluti nautgripahjarðar fjarlægður. Öll kvendýr og ungviði voru tekin úr umsjón bóndans til að tryggja velferð gripanna.
Stjórnvaldssektir og brot í sláturhúsi
Í einu tilviki var nautgripabóndi sektaður um 288.000 krónur fyrir að binda naut á bása, sem er bannað samkvæmt reglugerð nema við sérstakar aðstæður, svo sem við meðhöndlun eða þegar kvígur eru nálægt burði.
Þá var fuglasláturhús sektað um 144.500 krónur vegna brota á velferð fugla við aflífun. Óvænt rafmagnsleysi varð við slátrun og var ekki brugðist rétt við því, sem leiddi til ófullnægjandi meðferðar fugla á sláturlínu.
